OÉ-CUSSE, 11 jullu 2024 (TATOLI) – Sekretaria Rejionál Edukasaun no Asuntu Sosiál fó insentivu ba família vítima violénsia oioin hamutuk na’in-20, iha Oé-Cusse, ne’ebé kada ema hetan $100 hodi tulun sira ba atende nesesidade família nian.
Sekretária Rejionál Edukasaun no Asuntu Sosiál, Inácia Tamele, hateten apoiu ne’e tanba vítima sira balun foin mak sai husi uma mahon no seluk hela kle’ur ona ona iha sira-nia uma.
“Ita apoia orsamentu uitoan ba família ne’ebé mai ho kazu oioin, balun violénsia doméstika, seksuál, pikolojia no balun hetan torturasaun. Ida-ne’e halo tanba autoridade anteriór prevee ona osan atu fahe ba família sira-ne’ebé hetan susar ne’e”, Inácia Tamele dehan iha salaun Edukasaun Oé-Cusse.
Batista Punef, reprezenta família Vítima, agradese ba Governu tanba bele tau-matan, nune’em tulun sira hodi atende nesesidade uma laran nia.
“Ami agradese, tanba hetan ajuda uitoan husi Governu, liuliu autoridade RAEOA tanba tau-matan mai ami hanesan vítima”, nia hato’o.
Daudaun ne’e, Sekretaria Rejionál Edukasaun no Asuntu Sosiál koloka ona tékniku iha sub-rejiaun Oésilo, Pássabe no Nítibe atu kontinua rekolla dadus família vulneravél no família vítima sira, nune’e bele hetan tulun husi Governu.
Notísia relevante: PRADET Baucau apoia orsamentu ba vítima violénsia doméstika
Jornalista: Abílio Elo Nini
Editora: Maria Auxiliadora
