iklan

EKONOMIA, BAUCAU, HEADLINE, MUNISÍPIU, SOSIEDADE SIVĺL

PRADET Baucau apoia orsamentu ba vítima violénsia doméstika

PRADET Baucau apoia orsamentu ba vítima violénsia doméstika

Benefisiáriu violénsia doméstika bazeia ba jéneru hetan apoia orsamentu husi PRADET Baucau hodi halo negósiu ki'ik, kuarta (19/06). Imajen TATOLI/Natalino Belo.

BAUCAU, 19 maiu 2024 (TATOLI) – Psychosocial Recovery and Development in East Timor (PRADET) Rejionál Baucau kontinua apoia orsamentu ba vítima violénsia doméstika bazea ba jéneru hamutuk na’in-14 husi munisípiu tolu iha Rejionál Baucau.

Benefisiáriu na’in-14 referida maihusi munisípiu tolu hanesan Lautém, Viqueque no Baucau ne’ebé hetan apoia orsamentu hamutuk totál $5.600 ne’ebé kada benefisiáriu sei hetan apoia $400.

“Ita identifika mosu problema la’ós kestaun seluk maibé entre feen ho la’en, tanba kauza husi ekonomia,” Jestór Programa PRADET, Euricolano Granadeiro hateten iha Vila Antiga, kuarta ne’e.

Apoia orsamentu ne’e mai ho objetivu benefisiáriu sira utiliza orsamentu referida hodi halo negosiu eskala ki’ik nune’e benefisiáriu sira bele hahú negósiu no sei halo monitorizasaun inklui fó asisténsia téknika ba kada pesoál hodi dezenvolve liután negósiu.

Benefisiáriu hirak-ne’e kategoria ba etapa daualu ne’ebé PRADET indentifika relasiona ho kazu violénsia doméstika bazea ba jéneru, tanba kondisaun ekonomia família.

“Ita-nia esperansa bele responde duni sira-nia nesesidade loron-loron, tanba nesesidade mak sai kauza ba violénsia no difikuldade atu moris,” Euricolano Granadeiro akresenta.

Benefisiáriu Ilda Maria do Rego, agradese no sente kontente ba apoia orsamentu referida, tanba liuhusi negósiu bele ajuda nesesidade família.

“Ha’u sei halo negósiu kiik hodi ajuda ha’u-nia oan na’in-rua ne’ebé sei ki’ik,” Ilda do Rego hateten.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!