DILI, 17 jullu 2024 (TATOLI)—Sekretaria Estadu Formasaun Profisionál no Empregu (SEFOPE), kuarta ne’e, fó sai rezultadu korresaun teste eskrita ba vaga online serbisu iha Austrália, ne’ebé hatudu katak aplikante hotu liu teste.
Diretór Jerál SEFOPE, Carlito do Rosário Cabral, hateten, rezultadu ne’ebé fó sai bazeia ba rezultadu teste eskrita husi kandidatu traballadór iha fulan hirak liubá iha kada munisípiu, ne’ebé ninia prosesu finaliza laiha familiarizmu no partidarizmu, ho rezultadu hatudu kandidatu traballadór sira ne’ebé tuir teste eskrita hamutuk 42.081 no sira ne’ebé la tuir teste 8.687.
“Kandidatu traballadór 42.081 ne’ebé tuir ona teste eskrita liu hotu maibé hafoin halo korresaun ba matéria ita fahe ba kategoria hitu hanesan excellent, verry good, good, sufficient, poor, verry poor,” Diretór relata liuhusi konferénsia imprensa ne’ebé hala’o iha SEFOPE, Caicoli.
Husi kategoria hitu ne’e, sira ne’ebé tama kategoria excellent hamutuk 52, verry good 840, good 6.921, suffisient 8.517, poor 18.931, no verry poor 6.820.
“Ami deside hamutuk katak sira ne’ebé tama ka hetan excellent, verry good, no good, tama de’it lista prioridade, signifika karik iha demanda ruma husi empregadór mai sira ne’e mak ita sei dudu bá,” nia akresenta.
SEFOPE fó oportunidade ba sira ne’ebé tama iha kategoria sufficient, poor, verry poor hodi tuir formasaun lian inglés ba fulan-tolu ka neen no bainhira termina aprezenta sira-nia sertifikadu mai SEFOPE hodi halo entrevista liu de’it atu hatene katak sertifikadu lian inglés ne’ebé hetanne’e to’o iha ne’ebé, nune’e sira hatene sei muda kedas ba kategoria tolu hanesan excellent, verry good no good.
Notísia relevante : Aplikante 42.000-resin vaga online Austrália partisipa ezame eskrita
Sira ne’ebé tama kategoria excellent, verry good no good sei laiha tan teste ruma no hein de’it empregadór sira husu fó naran maibé nafatin desizaun ikus husi empregadór sira tanba bainhira sira husu tralladór, sira rasik mak sei fó teste abilidade nomós saúde.
“Ami husu imi sira ne’ebé tama kategoria tun ne’e hakarak ba duni Austrália tenke tuir duni formasaun iha munisípiu sira tanba SEFOPE rasik mak sei fasilita imi fó formasaun. Agora ita halo ona rekruta ba formadór sira ba munisípiu ida iha ema na’in-haat atu fasilita fó formasaun lian inglés ba ita-nia joven sira ne’ebé tama iha kategoria suffisient, poor no verry poor,” nia tenik.
SEFOPE sei fasilita formasaun ne’ebé kandidatu sira iha munisípiu la presiza mai Dili, maibé sira ne’ebé hakarak hili sentru formasaun sira seluk hanesan sols, leli no seluk tan ne’e livre. SEFOPE nafatin fasilita kandidatu sira ne’ebé inglés seidauk di’ak haruka formadór sira ba munisípiu fó formasaun.
“Ami mós iha kompromisu katak kandidatu sira ne’ebé naran iha ona sistema seidauk sai barak ita sei la halo prosesu foun ka rekrutamentu foun, ida-ne’e ami-nia kompromisu no kona-ba naran ba kandidatu sira ne’ebé tuir ona teste sei fó sai iha sesta semana ne’e,” nia dehan.
Ho rezultadu ohin, Diretór husu ba kandidatu sira atu matein nafatin akompaña informasaun ruma relasiona vaga, nune’e bele husu klarifikasaun iha SEFOPE no labele fiar ajénsia ka ema ruma lori lista ba husu osan tanba SEFOPE maka hala’o prosesu hotu.
Rezultadu ne’ebé ohin fó sai ine’e la arbiru tanba desizaun sira hotu ne’ebé SEFOPE foti koordena no koopera uluk ho parseiru instituisaun sira hanesan Komisaun Antí-Korrupsaun (CAC, sigla portugés), Provedoria Direitu Umanu no Justisa (PDHJ, sigla portugés) no seluk tan.
Durante ne’e, totál empregadór ne’ebé asina akordu ho SEFOPE hodi haruka trablladór bá serbisu iha Austrália hamutuk 203, maibé daudaun SEFOPE mós esforsu sei buka tan empreza foun balun hodi bolu trablladór sira bá serbisu iha Austrália.
Jornalista : Arminda Fonseca
Editora : Julia Chatarina
