BOBONARO, 19 jullu 2024 (TATOLI) – Diresaun Konservatóriu Servisu Rejistu Notariadu Munisípiu Bobonaro, planeia halo atendimentu ka rejistu movél iha suku no aldeia hodi fasilita komunidade sira trata dukumentu Billete Identidade (BI) no Sertidaun RDTL.
Diretór Konservatóriu Servisu Rejistu Notariadu Munisípiu Bobonaro, Marciano Mali Loe, rekoñese durante ne’e ema ho defisiénsia no idozu barak mak seidauk asesu dokumentu BI ho Sertidaun Nasimentu RDTL tanba prosesu atendimentu sentraliza de’it iha edifísiu Maliana.
Notísia relevante: Komunidade kestiona Notariadu Bobonaro kona-bá sistema atendimentu BI no Sertidaun RDTL
“Ami iha planu oinsá atu rejistu ba iha ita-nia maluk sira-ne’ebé mak laiha liu dokumentu, tanba bainhira sira atu trata eleitorál sira presiza dokumentu komprovativu tolu husi Notariadu hanesan BI ho Sertidaun Nasimentu RDTL no Pasaporte,” nia ko’alia iha Maliana, kinta ne’e.
Nia dehan, atu realiza atendimentu rejistu movél ne’e sei enolve mós ekipa husi Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) Munisípiu Bobonaro atu halo serbisu hamutuk hodi fasilita komunidade sira asesu dala ida ba dukumentu sira hanesan; BI, Sertidaun Nasimentu RDTL no kartaun eleitorál.
“Ami agora hein hela blanko sertidaun nasimentu, agora iha hela aprovizionamentu nasionál, karik iha tempu badak aprovizionamentu prosesu estoke hotu ona, ami halo pedidu ba nasionál, foti blanko sertidaun nasimentu, depois mak ita halo programa rejistu movél ba iha postu, suku to’o aldeia sira,” nia katak.
Diretór CNE Munisípiu Bobonaro, Juvito Ramos, konfirma parte Rejistu Notariadu presiza hakbesik servisu ba to’o duni baze, tanba durante ne’e CNE identifika komunidade sira barak laiha dukumentu komprovativu hirak-ne’e atu halo resenseamentu eleitorál atualizasaun bazededadus iha sistema STAE nian.
Liuhosi supervizaun iha terrenu, CNE nota katak iha tempu liubá parte notariadu no parseiru sira halo ona atendimentu movél ba komunidade sira iha postu administrativu Atabae no Lolotoe, maibé ba postu administrativu seluk sei kontinua halerik.
Nia observa katak komunidade liuliu ferik ho katuas sira labele mai direita trata dukumentu BI ho sertidaun nasimentu iha edifísiu notariadu, tanba kestaun saúde no distánsia dook.
“Iha Bobonaro, Cailaco no Balibó sira-ne’ebé barak mak seidauk hetan dokumentu sira-ne’e, ida-ne’e ami konfirma ho diretór sesante katak sira la prevee orsamentu atu koloka tékniku sira ba iha baze,” nia katak.
Enkuantu daudaun ne’e Diresaun Rejistu Servisu Notariadu Munisípiu Bobonaro kontinua imprime Billete Identidade provizóriu ka surat tahan.
Notísia relevante: Mákina prodús BI avaria dezde 2018, Notariadu Bobonaro husu MJ solusiona
Jornalista: Sérgio da Cruz
Editór: Evaristo Soares Martins
