BOBONARO, 06 janeiru 2023 (TATOLI) – Diretór Munisipál Konservatóriu Servisu Rejistu Notariadu (DMCSRN, sigla portugés) munisípiu Bobonaro, Deolindo dos Santos, husu Ministériu Justisa (MJ) atu solusiona problema mákina Fargo ne’ebé halo impresaun Billete Identidade tanba avaria dezde 2018.
Deolindo argumenta, Ministériu Justisa presiza tau atensaun sériu ba problema ne’e, tanba durante ne’e komunidade sira-ne’ebé mai hosi área rurál sempre kestiona kona-bá mákina ne’e.
Notísia relevante: DMCSRN Bobonaro menus rekursu umanu no transporte operasionál
“Ami dezde 2018 até agora la print Billete Identidade tanba mákina Fargo aat, lori tiha ona ba Dili, to’o agora ami seidauk hetan informasaun atu sosa foun ka halo manutensaun. Ne’e duni ami husu Ministru Justisa atu rezolve, tanba durante ne’e ami prontu halo atendimentu BI maibé ami prodús ho ‘HVS’ mutin provizóriu de’it,” nia levanta preokupasaun ne’e durante halo enkontru ho Ministru Justisa, Tiago Amaral Sarmento, iha edifísiu Terra no Propriedade, munisípiu Bobonaro, kuarta ne’e.
Iha biban ne’e, Diretór Deolindo realata problema ne’ebé diresaun ne’e enfrenta mak menus rekursu umanu, tanba iha de’it funsionáriu na’in-sia, komposta hosi permanente na’in-hitu, kazuál ida no kontratadu ida, nune’e la sufisiente atu halo atendimentu ba komunidade ho aldeia 193, suku 50, postu administrativu neen ne’ebé ho númeru boot tebes.
Nune’e mós enfrenta problema laiha transporte hodi fasilita funsionáriu sira halo serbisu atendimentu públiku iha munisípiu no nesesidade instituisaun sira seluk.
“Ha’u dalaruma simu informasaun hosi nasionál dehan tenke tún lalais ba Dili, ha’u dezaraska tenke uza transporte privadu ka transporte públiku, tanba ami laiha transporte,” Deolindo haktuir.
Nune’e mós problema seluk mak fasilidade mobilizáriu sira hanesan meza no kadera balun kondisaun ladi’ak ona no ekipamentu eletróniku sira hanesan printer, laptop no komputadór.
Entretantu, Ministru justisa Tiago Amaral Sarmento, orienta ona diretor jerál notariadu alista ona problema ne’e atubele rezolve iha tempu tuir mai.
“Ministériu Justisa nia polítika iha fulan ida nian sei forma ekipa iha parte leste, oeste no rai-klaran nian sei tún direita ba iha kada postu administrativu, depois suku sira rekolla hotu informasaun, tanba ita-nia populasaun aumenta barak, entaun notáriu sei tún ba emite sertidadaun nasimentu RDTL no Billete Identidade ba sidadaun hotu-hotu ho gratuita,” Governante ne’e promete.
Notísia relevante: Janeiru-juñu, DMCSRN Bobonaro rekolla $2.150
Jornalista : Sérgio da Cruz
Editór : Evaristo Soares Martins
