DMCSRN Bobonaro menus rekursu umanu no transporte operasionál
BOBONARO, 07 setembru 2022 (TATOLI) – Diresaun munisipál konservatóriu servisu rejistu notariadu (DMCSRN, sigla portuges), munisípiu Bobonaro, daudaun ne’e enfrenta hela problema menus rekursu umanu no transporte operasionál atu halo atendimentu ba komunidade.
Diretór DMCSRN munisípiu Bobonaro, Deolindo Gouveia dos Santos, hateten daudaun ne’e enfrenta hela problema rua ne’e atu halo atendimentu ba komunidade sira iha baze.
Nia akresenta, daudaun ne’e totál funsionariu na’in-10, kompostu hosi permanente na’in-neen, kontratadu na’in-tolu no na’in-ida kontratu nomeasaun hosi Ministériu Justisa.
Enkuantu kona-bá transporte operasionál kompostu hosi karreta no motorizada to’o agora laiha.
Tuir nia, problema ne’e difikulta funsionáriu sira atu halo atendimentu ba komunidade sira iha postu administrativu to’o suku.
Notísia relevante: DMCSRN sei prodús BI ba abitante Lolotoe
“Ami-nia difikuldade kona-bá rekursu umanu no transporte, entaun planu sira atu halo atendimentu ba iha postu sira-ne’e sei la la’o. Ne’e duni ami azije atubele aumenta rekursu umanu hodi mellora atendimentu ba komunidade sira iha munisípiu Bobonaro,” nia informa ba jornalista sira, iha kna’ar-fatin, suku Holsa, kuarta ne’e.
Diretór ne’e dehan, ba oin sei implementa planu atendimentu iha postu, tanba prezidente autoridade munisípiu Bobonaro, Ernesto de Oliveira Barreto, apoia ona karreta rua nune’e bele fasilita komunidade sira iha baze asesu Billete Identidade (BI), sertidaun RDTL no dokumentu importante sira seluk.
Nia subliña, atendimentu movél ne’e sei implementa hotu iha suku sira-ne’ebé hela distánsia dook hosi vila, kondisaun estrada, maibé programa ne’e sei hahú uluk iha postu administrativu Lolotoe kobre suku hitu.
“Ami sei halo iha postu administrativu Lolotoe iha 20 setembru, ami sei rejista ba sertidaun nasimentu ba ita-nia oan no bei-oan ne’ebé ho idade zero to’o tinan-lima, ami mós iha planu halo rejista movél ba BI off line, ami serbisu hamutuk ho ekipa sira iha nasionál,” nia katak.
Enkuantu konabá mákina Fargo prodús Billete Identidade ne’ebé avaria dezde tinan hirak liubá to’o agora seidauk iha rezultadu hosi Ministériu Justisa atu halo manutensaun.
Daudaun ne’e sei kontinua prodús kartaun Billete Identidade provizóriu ho surat-tahan mutin de’it, maibé foin lalais mákina printer durante ne’e uza hodi halo prosesamentu mós avaria semana haat ona, foin mak halo manutensaun.
“Semana ida liubá, mákina ne’e funsiona di’ak ona, agora ami bele atende ona ita-nia komunidade trata Billete Identidade, sira-ne’ebé hetan provizóriu ami fó ona oráriu ida, ami prontu atu ba print BI orijinál kada seman rua dala-idaa iha Dili,” nia dehan.
Tuir dadus estatístika 2020, munisípiu Bobonaro iha aldeia 193, suku 50, postu administrativu neen, kompostu hosi Atabae, Balibo, Cailaco, Maliana, Bobonaro no Lolotoe, ho totál populasaun 128,522 komposta hosi feto 57,835, mane 70,687 ho totál xefe familía 28,940.
Notísia Relevante: Mákina prodús BI avaria dezde 2017, DMCSRN Bobonaro husu MJ solusiona
Jornalista: Sérgio da Cruz
Editór: Evaristo Soares Martins
