OÉ-CUSSE, 19 Jullu 2024 (TATOLI) – Polísia Nasionál Timor-Leste (PNTL), liuhusi Unidade Patrullamentu Fronteira (UPF) kompañia Carlie, iha Rejiaun Administrativa Espesiál Oé-Cusse Ambeno (RAEOA), kaptura membru Grupu Arte Marsiál (GAM) husi Organizasaun Persaudaraan Setia Hati Terate (PSHT) na’in-18, iha aldeia Hoineno, suku Bobometo, sub-rejiaun Oésilo.
Komandante UPF, Superintende Polísia Euclides Belo, informa razaun kapturasaun ba membru GAM na’in-18 ne’e, tanba tama ilegalmente iha fronteira hafoin partisipa serimónia gradusaun sa’e sintu iha Kupang, Nusa Tenggara Timur (NTT), Indonézia, ne’ebé kompostu husi mane na’in-17 no feto ida.
“Horisehik kedas ita entrega ona ba iha komandu PNTL Oé-Cusse atu halo prosesu investigasaun”, Euclides Belo dehan ba Tatoli via WhatsApp, ohin.
Komandante esplika katak pesoál sira ne’e envolve iha atividade kontra-ordenasaun territoriál no rezolusaun Governu nian katak pratika arte marsiál no rituál suspende.
“Kapturasaun ne’e bazeia ba medida operasaun UPF nian iha fronteira, tanba baze juridíku rezolusaun Governu nian daudaun ne’e suspende pratika atividade arte marsiál iha Timor-Leste”, Euclides Belo afirma.
Tuir rezolusaun Governu númeru 45/2023, 10 Novembru, determina suspensaun kona-ba ensinu aprendizajen no prátika arte marsiál ho adosaun medida hodi asegura orden públika. Suspensaun ne’e halo tanba akontese insidente iha fatin ketak-ketak iha territóriu, ne’ebé envolve elementu arte marsiál sira-ne’ebé pertense ba grupu refere.
Notísia relevante: PM Xanana lamenta timoroan oho malu iha Fátima, sei deside taka totál GAM-GAR
Jornalista Tatoli tenta konfirma asuntu ne’e ho Komandante PNTL Oé-Cusse, Superintendente Polísia Nicolau Francelino da Costa, maibé laiha fatin tanba okupadu ho asuntu seluk.
Tuir observasaun jornalista Tatoli, sidadaun na’in-18 ne’ebé hetan kapturasaun ne’e daudaun iha hela komandu PNTL Oé-Cusse.
Notísia relevante: Fanatizmu ba grupu arte marsiál: bele halakon sentidu “maun-alin” nu’udar maubere ou timoroan
Jornalista: Abílio Elo Nini
Editora: Maria Auxiliadora
