OÉ-CUSSE, 30 Jullu 2024 (TATOLI) – Veteranu Agustinho da Costa, ne’ebé reprezenta populasaun husi suku 18 iha Rejiaun Administrativa Espesiál Oé-Cusse Ambeno (RAEOA) husu ba autoridade sira atu integra dezenvolvimentu infraestrutura bázika iha Planu Asaun Anuál (PAA) 2025 hodi hakbesik liután komunidade sira iha sub-rejiaun Oésilo, Pássabe no Nítibe ba dezenvolvimentu rurál.
“Nu’udar veteranu, ami sei akompaña hela governasaun ida-ne’e. Iha RAEOA foin la’o fulan neen, ha’u bele hateten ita labele halo milagre, maibé planu dezenvolvimentu ba oin 2025 nian fiar katak maun Rogério Lobato [Prezidente RAEOA] sei halo buat ruma iha rai Oé-Cusse molok tinan lima, tanba nia hatene povu Oé-Cusse terus”, Agustinho da Costa, vereteranu Oé-Cusse, dehan iha konferénsia imprensa ne’ebé hala’o iha otél Ambeno.
Nia dehan katak Prezidente Autoridade promote ona katak sei tau prioridade ba área rurál sira, liuliu ba estrada, bee-moos, edukasaun no saúde. Tanba ne’e, iha orsamentu 2025 bainhira orsamentu aprova iha Parlamentu Nasionál, Oé-Cusse nia sei hala’o buat ne’ebé planeia ona, liuliu ba infraestrutura bázika.
Notísia relevante: ADN orienta Waskita Karya sobu estrada kilómetru 9,5 iha Nítibe-Oésilo
“Ami veteranu ho povu suku 18 sei akompaña, se dezenvolvimentu la la’o, husu tansá mak la la’o. Osan laiha ka? Ami sei husu ida-ne’e”, nia tenik.
Iha sorin seluk, Jestór sub-rejiaun Nítibe, Agustinho Afulit, rekomenda ba Governu sentrál no autoridade RAEOA atu kontinua obra sira-ne’ebé Governu anteriór husik hela, liuliu infraestrutura sira.
“Programa sira-ne’ebé Governu anteriór halo ona iha tinan hirak kotuk ne’e, ami nafatin sujere ba Governu sentrál lideradu husi maun boot Kay Rala Xanana Gusmão atu kontinua ita-nia programa sira-ne’ebé uluk halo, liuliu estrada”, nia sujere.
Postu administrativu Nítibe komposta husi suku lima, aldeia 17, ne’ebé kuaze tinan 20-resin seidauk asesu ba estrada di’ak, bee-moos, agrikultura no saúde nian.
“Atu haree rejiaun Oé-Cusse ne’e iha tinan lima oin mai sai di’ak, Prezidente Autoridade atuál, durante nia mandatu, bele halo Oé-Cusse sai furak liután iha futuru, tanba atu goza independénsia ne’e, só iha Oé-Cusse vila, Pante Makasar de’it, maibé povu barak iha baze sei sofre problema infraestrutura bázika, katak setór hothotu seidauk la’o másimu iha komunidade nia moris”, nia afirma.
Notísia relevante: Paulino Marques husu Autoridade RAEOA prioriza estrada iha Pássabe
Jornalista: Abílio Elo Nini
Editor: Maria Auxiliadora
