OÉ-CUSSE, 30 Jullu 2024 (TATOLI) – Ministériu Asuntu Kombatente Libertasaun Nasionál (MAKLN) halo ona validasaun ba dadus kombatente libertasaun nasionál faze daruak ne’ebé rejistu iha 2009 hamutuk na’in-3.630 iha Rejiaun Administrasaun Espesiál Oé-Cusse Ambeno (RAEOA), liuhusi asina karta aseitasaun husi ekipa verifikadór sira.
Komisáriu Veteranu iha MAKLN, José António Ote, hateten hafoin asina ata validasaun sei submete ba iha ministériu atu prosesu hodi prepara editál atu halo públikasaun ho tempu loron 60 hodi bele halo kontestasaun.
“Ita husu kombatente sira-ne’ebé rejistu ona, tanba ita sei halo públikasaun editál nian atu idaidak bele haree nia kategoria iha ministériu, karik la satisfás iha direitu halo kontestasaun”, José Ote dehan.
Iha sorin seluk, Prezidente Konsellu Veteranu Oé-Cusse, Venâncio Lafo, fó sai dadus kombatente rejista iha 2009 hamutuk 3.958, maibe validadu iha 3.630 (92%) no la validadu iha 328 (8%).
Kombatente hirak-ne’e mai husi zona Nítibe 713, validadu 692 (97%), la validadu 21 (3%), zona Oésilo 926, validadu 839 (91%), la validadu 87 (9%), zona Pante Makasar 1.911, validadu 1.735 (91%), la validadu 176 (9%) no zona Pássabe 406, validadu 364 (90%), la validadu 42 (10%).
Notísia relevante: Konsellu Veteranu Oé-Cusse seidauk iha ossoario haloot restu mortál
“Ohin, verifikadór sira asina ata ne’e, depois sei hein avizu, kuandu editál mak korresponde ho sira-nia osan, atu sé mak tama iha 0a2, 3a7, 8a14, 15a19 no 20a24, maibé 3a7 sei simu osan dala ida, ne’e pensaun pekuniáriu, ba 8a14 no seluk-tan sei simu kada fulan”, nia esplika.
Ekipa verifikadór ne’ebé asina ata validasaun ne’e hamutuk na’in-65, mai husi kada zona responsavel ema na’in-tolu ho nurep kada suku na’in-tolu.
Notísia relevante: Verifikasaun dadus veteranu rejistadu 2009 kontinua hikas iha 28 setembru
Bazeia ba livru 3-C, Orsamentu Jerál Estadu (OJE) 2023 RAEOA-ZEESM nian, haktuir benefisiáriu neʼebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363 no mártir libertasaun nasionál hamutuk ema na’in- 223.
Jornalista: Abílio Elo Nini
Editora: Maria Auxiliadora
