BOBONARO, 05 agostu 2024 (TATOLI)-Ensinu Báziku Filiál (EBF) Poerema, aldeia Liabote, suku Meligo, postu administrativu Cailaco, munisípiu Bobonaro, daudaun ne’e enfrenta problema laiha profesór atu hanorin estudante-sira nune’e koordenadór eskola deside hanorin kada loron ho métodu multiklase.
Situasaun ne’e prezudika ensinu no aprendizajen, tanba akumula estudante na’in-49, mane 28 no feto 21 iha sala ida de’it.
Notísia relevante: EBF Poerema didin de’it ho bebak
“Ha’u hanesan manorin, ne’ebé ha’u atu jere tempu ne’e hetan dezafiu oituan, araska tanba ha’u mesak de’it, ha’u uza multiklase, primeiru-anu, segundu no terseiru-anu sira-ne’e tau-hamutuk, depois mak ha’u fahe tempu, kuandu ha’u hanorin sira, disiplina ida de’it, ezemplu disiplina Matemátika, entaun Matemátika hotu,” Koordenadór EBF Poerema, Rosalino Mau-Pelu, informa ba jornalista sira foin lalais ne’e.
Koordenadór ne’e afirma, bainhira partisipa enkontru ruma iha serbisu edukasaun Bobonaro, atividade enisnu no aprendizajen paradu.
Responsável eskola ne’e informa, problema ne’e hato’o ona ba Servisu Edukasaun Munisipál Bobonaro no konsege hetan kolokasaun profesór na’in ida ne’ebé pasa iha rekrutamentu profesór bolsa kandidatu faze primeiru.
“Depois koloka tiha iha-ne’e, ninia kondisaun fíziku ladi’ak, ne’ebé nia muda fali ba iha EBC ne’ebé eskola ida ne’e pertense ba,” nia katak.
Reprezentante Inan-Aman, Durante de Oliveira Soares, prekupa no husu ba Ministériu Edukasaun atu konsidera problema ne’e ho urjénsia.
“Ami hakarak aumenta profesór, nune’e hanorin ami-nia oan sira sai matenek, se lae ami-nia oan sira ne’e beik ba beibeik, tanba profesór na’in ida de’it ne’e, ami-nia oan atu matenek halo nusá,” nia katak.
Enkuantu daudaun ne’e Ministériu Edukasaun liuhosi projetu komunitária konstrui ona eskola ne’e hodi fasilita estudante sira partisipa iha ensinu no aprendizajen iha fatin dignu no seguru, tanba kondisaun infraestrutura antes ne’e kuaze aat no estragu grave.
Ho implementasaun obra ne’e, jerente eskola no inan-aman sira sente kontente no agradese, tanba Governu kumpri duni promesa ne’ebé promete liuhusi diálogu komunitária entre governu ho komunidade organiza husi FONGTIL tinan kotuk.
Notísia relevante: MEJD sei fó atensaun sériu ba eskola EBF Poerema
Jornalista: Sérgio da Cruz
Editór: Evaristo Soares Martins
