DILI, 15 agostu 2024 (TATOLI)–Dili Institute of Technology (DIT) no Institutu Politékniku Betano (IPB) kontinua fasilita nia rekursu umanu hodi hasa’e nível edukasaun iha rai-li’ur, nune’e bele hasa’e kualidade edukasaun iha universidade ida-idak iha Timor-Leste.
Reitór DIT, Salustiano dos Reis Piedade, hateten, daudaun ne’e dosente hamutuk na’in-10 mak hala’o estudu iha nível mestradu no doutoramentu.
“Iha na’in-hitu ne’ebé agora hola nia programa doutoramentu iha Indonézia, iha universitas Udayana Bali ne’e sira foti área turizmu, rekursu umanu no finansa. Ida iha Institut Teknologi Bandung-Jawa Barat ne’e foti área petrolíferu. Na’in-tolu iha Brazíl ne’e iha área língua hotu,” Reitór informa iha ninia knaar fatin, kinta ne’e.
Notísia relevante : Reitór DIT husu MESSK fó lisensiamentu ba IES loke kursu doutoramentu
Dosente na’in-hitu ne’ebé daudaun ne’e hala’o estudu iha Indonézia ne’e finansia husi DIT rasik no na’in-tolu iha Brazíl ne’e finansia husi Governu liuhusi Fundu Dezenvolvimentu Kapitál Umanu (FDCH, sigla portugés).
Totál funsionáriu iha DIT hamutuk 214, ne’ebé husi númeru ne’e nível edukasaun mestradu 60% no naun akadémiku 40%, signifika funsionáriu administrasaun, funsionáriu, cleaner, seguransa, enkuantu totál estudante ativu hamutuk 5.014.
Iha fatin seluk, Prezidente Institutu Politékniku Betano (IPB), Acácio Cardoso Amaral, hateten, daudaun ne’e dosente ida husi IPB hala’o nia estudu iha Japaun ba nível doutoramentu iha área konstrusaun sivíl.
“Nune’e mós iha dosente na’in-haat ne’ebé mak atu bá tan iha Portugal ne’e mós ba nível doutoramentu no sira na’in-haat ne’e rua ba área konstrusaun sivíl no rua ba produsaun animál,” nia dehan.
Jornalista : Osória Marques
Editora : Julia Chatarina
