DILI, 20 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) submete proposta adisionál millaun $40,6 ba Komité Revizaun Orsamentu (KRO) 2025, tanba tetu fiskál ne’ebé simu seidauk sufisiente atu kobre programa sira ne’ebé sei implementa iha tinan oin.
Diretór-Jerál Servisu Korporativu MAPPF, Rufino Soares Gusmão, informa ministériu prevee millaun $61,6 iha proposta inisiál atu responde ba planu 2025 nian, maibé iha tetu fiskál ne’ebé KRO fó hetan de’it millaun $18,2. Tanba ne’e, Ministériu Agrikultura halo fali ezersísiu ida hodi aprezenta fali proposta adisionál ho montante millaun $40,6.
“Iha 15 Agostu 2024, Ministériu Agrikultura, Pekuária, Peska no Floresta halo ona nia aprezentasaun ba Komité Revizaun Orsamentu relasiona ho pakote fiskál ne’ebé ita simu ona iha de’it millaun $18,2”, Rufino Gusmão dehan ba Tatoli iha Comoro, ohin.
Dirijente ne’e esplika katak verba millaun $18,2 ne’e hafahe ba kategoria tolu mak saláriu no vensimentu millaun $7,8, bens no servisu millaun $10 no transferénsia públika $459.007.
Tuir Rufino Gusmão, bainhira pakote fiskál millaun $18,2 ne’e mak mantein maka sei fó impaktu ba planu sira ne’ebé ministériu planeia, tanba ne’e husi proposta adisionál ne’ebé aprezenta ne’e husu adisionál ba saláriu no vensimentu ba funsionáriu kazuál 322 ho montante rihun $942, ba kapitál menór millaun $12,8 no kapitál no dezenvolvimentu millaun $20,1.
“Adisionál ne’ebé ministériu propoin ne’e ho intensaun atu mantein funsionáriu kazuál 322 serbisu iha tinan oin, depois atu responde ba projetu sira ne’ebé sei iha retensaun, inklui projetu foun sira ne’ebé sei realiza iha 2025. Bainhira proposta adisionál sira ne’e maka la hetan aprovasaun, konserteza sei fó impaktu ba serbisu MAPPF nian, tanba sei lakon nia funsionáriu tékniku kazuál no projetu sira ne’ebé tama ona iha retensaun, reapropriasaun no projetu foun sira sei labele implementa iha 2025”, esplika.
Depoizde aprezentasaun, Primeiru-Ministru, Xanana Gusmão, husu ba MAPPF atu kontinua halo ezersísiu ba orsamentu adisionál sira ne’ebé submete ona no bainhira hakarak halo redusaun sei iha tempu atu konsulta ho KRO no nia rezultadu husi proposta sira ne’e sei hein konfirmasaun husi Ministériu Finansa.
Rekorde katak orsamentu ba MAPPF iha 2024 hamutuk millaun $30,7, ne’ebé aloka ba saláriu no vensimentu millaun $9,4, bens no servisu millaun $9,3, transferénsia públika $459.007, kapitál menór millaun $4,8 no kapitál no dezenvolvimentu millaun $6,7.
Tuir Portál Transparénsia, ezekusaun orsamentu MAPPF nian to’o ohin loron atinje ona 46,2%.
Jornalista: Tomé Amado
Editora: Maria Auxiliadora
