OÉ-CUSSE, 21 Agostu 2024 (TATOLI) – Programa Nasionál Dezenvolvimentu Suku (PNDS) nia projetu siklu daneen hamutuk unidade 20 iha Rejiaun Administrativa Espesiál Oé-Cusse Ambeno (RAEOA) realiza ona iha suku 18.
“Iha tinan 2024 ne’e, ita implementa hotu ona. Suku balun ita mobiliza traballadór, para ita-bele hahú serbisu no prosesu aprovizionamentu sira kuaze remata ona”, Diretór PNDS Oé-Cusse, João Bobo, dehan ba jornalista sira iha Oé-Cusse, ohin.
Notísia relevante: PNDS lansa fatuk dahuluk ba projetu dada bee-moos ba uma-kain 40 iha Bobokase
Projetu sira iha siklu daneen hamutuk 20 maioria ba setór infraestrutura mak halo reabilitsaun estrada no ba setór edukasaun mak aumenta saladeaula iha eskola sira.
“Ba setór edukasaun [implementa] iha sub-rejiaun Pássabe hodi aumenta sala ba eskola sira, iha suku Nípani aumenta sala rua, suku Cunha mós sala rua kompleta ho nia mobiliáriu sira no konstrui mós irrigasaun ba natar, maibé siklu daneen ne’e barakliu mak estrada”, nia informa.
Dirijente ne’e salienta katak orsamentu ba PNDS Oé-Cusse 2024 ne’e aloka kedan ba kada suku, liuliu ba infraestrutura, hanesan iha suku Bobokase prevee $44.250, bazeia ba númeru populasaun no distánsia.
“Suku ne’ebé aloka osan boot liu mak Abani, iha sub-rejisaun Pássabe, no Oésilo mak suku Bobometo de’it. Sira-nia orsamentu ba infraestrutura nian mak $53.500, suku sira seluk kauze rihun $44 mai kraik”, nia adianta.
Notísia relevante: PNDS Oé-Cusse sei ezekuta rihun $930-resin atu finansia programa 16
Totál orsamentu ne’ebé PDNS Oé-Cusse ezekuta iha siklu daneen 2024 ne’e hamutuk $852.500 hodi implementa projetu iha suku 18.
Jornalista: Abílio Elo Nini
Editora: Maria Auxiliadora
