DILI, 03 setembru 2024 (TATOLI) – Governu liuhusi Vise-Primeiru-Ministru no Ministru Dezenvolvimentu Rurál no Abitasaun Komunitariu (MDRHC-sigla portugés) Mariano Assanami Sabino, tersa ne’e, iha Palásiu Governu Dili, asina akordu ho Banku Dezenvolvimentu Aziatíku (ADB-sigla ingles) hodi dezenvolve setór infraestrutura bee iha área rurál no fasilita agrikultór sira lori produtu ba merkadu.
“Ita selebra akordu ida ho ADB ne’ebé mak fó apoia mai ita ho gratuita, la’ós deve, ida ne’e apoiu ida ba liu área rurál, projetu ne’e gratuita husi ADB atu dezenvolve infraestrutura bee-nian no fasilita ita nia agrikultór sira bele lori produtu lokál ba merkadu,” Vise-Primeiru-Ministru Assanami hateten ba jornalista sira hafoin ramata asina akordu.
Nia dehan, avansa uluk ho akordu kooperasaun ne’e no ba oin sei kontinua ho programa lubuk ida ne’ebé sei iha faze diskusaun hafoin haka’at ba implementasaun.
“Iha atividade lubuk ida mak sei presiza diskute, maibé, akordu ne’ebé asina ona ne’e ita avansa ba nia implementasaun, iha programa balun mak ita sei presiza diskute kle’an ba oin saida-saida mak ami halo hamutuk,” Vise PM ne’e afirma.
Ho inisiativa husi AD, Governante ne’e agradese no sei servisu hamutuk ho komunidade sira iha rurál liuliu kona-ba infraestrutura bee-moos ba komunidade sira.
“ADB fó apoiu ne’e Governu mak sei implementa, entaun ita sei haree ho didi’ak atu jere hamutuk ho ADB, maske sira sei halo monitorizasaun no haree progresu sira la’o ka la’e. Fiar katak Governu sei implementa ho di’ak, ita hein katak apoiu ida ne’e sei signifika tebes ba povu iha área rurál,” nia hateten.
Nia hatutan, iha akordu ne’e mensiona uluk projetu rua hanesan infraestrutura bee ba komunidade sira no hasa’e produsaun agrikultór sira nian oinsa bele lori ba merkadu.
Programa rua ne’e sei implementa uluk iha Munisípiu Manatuto iha tempu besik. Fiar katak programa gratuita ne’e la’o sei benefisia ba komunidade sira iha área remota.
Jornalista: Hortencio Sanchez
Editór: Florencio Miranda Ximenes
