DILI, 13 setembru 2024 (TATOLI)—Bolseiru hamutuk 2.400-resin ne’ebé sai benefisiáriu ba bolsa parsiál asina ona kontratu ho Governu liuhusi Ministériu Planeamentu Investimentu no Estratéjiku (MPIE), ne’ebé Fundu Dezenvolvimentu Kapitál Umanu (FDCH, sigla potugés) mak selu.
“Kona-ba bolseiru parsiál ne’e na’in-2.400-resin mak asina ona kontratu no ita mós selu ona sira-nia propina, hanesan Cristal, UCT no seluk tan,” Diretór Ezekutivu FDCH, Júlio Aparício, informa iha Delta Nova, Comoro, sesta ne’e.
Enkuantu, estudante na’in-500 seidauk asina nune’e FDCH sei la’o tuir regra aplikável.
“Agora ami rejistu ne’e 2.400-resin. sira-ne’ebé la asina, ami la’o tuir de’it regra, katak kuandu taka ona mak laiha opurtunidade,” nia akresenta.
Governu liuhusi FDCH fó tempu durante fulan-ida no prolonga to’o fulan-rua, nune’e ramata ona iha fulan-agostu nia rohan.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e so fó apoiu de’it ba kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Bolsa hakbiit kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Enkuantu, ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Jornalista : Osória Marques
Editora : Julia Chatarina
