DILI, 17 setembru 2024 (TATOLI)–Embaixadora Timor-Leste ba Nova Zelándia, Idelta Maria Rodrigues, tersa ne’e, hasoru malu ho Primeiru-Ministru (PM), Kay Rala Xanana Gusmão, molok hala’o misaun diplomátika.
“Iha relasaun ho empregu tanba Nova Zelándia mós husu ba Governu Timor-Leste atu haruka traballadór sira ba dala-uluk no ha’u hasoru malu ho Sekretaria Estadu Formasaun Profisionál no Empregu (SEFOPE),” Embaixadora Idelta Maria Rodrigues, hateten hafoin hasoru malu ho Xefe Governu, iha Palásiu Governu.
Nia dehan, to’o agora laiha akordu entre nasaun rua ne’e, maibé simu ona pedidu husi Nova Zelándia, tanba ne’e presiza diskusaun tan ho ministériu relevante sira atu dezeña enkuadramentu ba akordu ruma.
Notísia relevante : Xefe Estadu fó pose ba Embaixadór TL bá Nova Zelandia no Korea Súl
Embaixadora fiar katak akordu ne’e bele implementa ho di’ak tanba nia haree husi Timor-Leste nia esperiénsia ne’ebé oras ne’e daudaun ativu traballadór sira bá Austrália, Koreia Súl no Japaun.
“Agora daudaun sira prepara hela sistema hamutuk ho Governu atu prepara estrutura akordu nian,” nia akresenta.
Iha sorumutuk ho PM Xanana, parte rua diskute mós kona-ba projetu kooperasaun entre nasaun rua iha área dijitalizasaun ne’ebé sei suporta servisu públiku sira. Nune’e, sei iha sorumutuk seluk ho ministériu sira seluk molok sai husi Nova Zelándia.
“Semana tuirmai ha’u sei sai husi Nova Zelándia hodi hala’o misaun ida, ha’u sei hasoru malu ho Primeiru-Ministru hodi aprezenta programa ne’ebé sei hala’o nomós simu orientasaun husi Xefe Governu,” nia tenik.
Rekomendasaun husi Primeiru-Ministru mak atu husu koordenasaun serbisu di’ak, katak bainhira halo buat ruma iha nível a’as, presiza koordena husi nível kiik to’o a’as tanba Nova Zelándia iha kooperasaun ho ministériu barak iha Timor-Leste.
Aleinde ne’e, Primeiru-Ministru mós ko’alia kona-ba ekonomia azul ne’ebé sai nu’udar Governu nia prioridade.
Jornalista : Osória Marques
Editora : Julia Chatarina
