DILI, 24 setembru 2024 (TATOLI)—Diretora Nasionál Polítika Igualdade Jéneru iha Sekretaria Estadu ba Igualdade (SEI), Celeste Ramos Martins Gonçalves, prefere instituisaun relevante hamosu sinál jestuál ba Ema ho Defisiénsia iha kualkér atividade, nune’e sira bele partisipa ho másimu.
“Sinál Jestuál ne’e importante tebes no loloos ita presiza valoriza iha kualker atividade hodi halibur sira. ida-ne’e esforsu ida no Ministériu Solidaridade Sosiál no inkluzaun (MSSI) aprova ona ba Planu Asaun Nasionál kona-ba ema ho defisiénsia nomós iha kalendarizasaun ba sira-nia direitu. Presiza promove sinál jestuál nune’e bele hafasil fali ema seluk,” Diretora hateten ba Agência Tatoli, iha salaun Delta Nova, Comoro, tersa ne’e.
Notísia relevante : SEKOMS kontinua apoia KDTTL iha formasaun lian jestuál
Aleinde ne’e, nia mós nota, liuhusi sinál jestuál ne’e bele haburas no hasa’e ema-nia koñesimentu ba progresu dezenvolvimentu iha rai-laran, liu-liu kona-ba juventude sira.
Antes ne’e, Sekretária Estadu ba Igualdade, Elvina Sousa Carvalho, hateten, SEI fó importánsia ba sinál jestuál ba komunidade defisiénsia tilun iha Timor-Leste.
“Importánsia lian jestuál hodi asegura komunikasaun ida inkluzivu ba komunidade defisiénsia tilun, sensibiliza kona-ba direitu ema ho defisénsia hodi asesu ba edukasaun no seluk tan. Tamba ne’e, asegura Governu aloka nia rekursu ba dezenvolvimentu lian jestuál nasionál iha Timor-Leste no advoka ba muda pensamentu sosiedade ba ema ho defisénsia,” nia dehan.
Sinál jestuál mak komunikasaun ho maneira utiliza jestu liman ne’ebé dala barak konsidera hanesan meiu komunikasaun ba ema ne’ebé iha difikuldade ba rona no ko’alia ka defisiénsia tilun.
Iha loron 19 dezembru 2017, Asembleia Jerál Organizasaun Nasaun Unida (ONU) deklara loron 23 setembru hanesan loron internasionál ba sinál jestuál.
Timor-Leste asina no ratifika ona Konvensaun ONU ba direitu ema ho defisiénsia iha tinan 2022, ne’ebé rekoñese no promove utiliza sinál jestuál hanesan meiu komunikasaun ida.
Jornalista : Osória Marques
Editora : Julia Chatarina
