DILI, 22 fevereiru 2024 (TATOLI)–Sekretaria Estadu Komunikasaun Sosiál (SEKOMS) komprometidu kontinua apoia Klibur Difisiénia Tilun Timor-Leste (KDTTL), iha formasaun lian jestuál.
“Apresia ho inisiativa Klibur Difisiénia Timor-Leste tanba hakarak kontinua serbisu hamutuk iha lian jestuál. Ita hotu hatene katak se ita akompaña notísia sira ne’ebé fó sai hosi mídia RTTL no GMN-TV, iha lian jestuál ho intensaun katak ema ho difisiénsia tilun mós bele akompaña informasaun sira tantu rai-laran nomós rai-li’ur,” Sekretáriu Estadu Komunikasaun Sosiál, Expedito Dias Ximenes, hateten hafoin simu vizita delegasaun iha ninia gabinete, Palásiu Governu, kinta ne’e.
Notísia relevante : Dezenvolve lian jestuál presiza kria manuál atu implementa
Tanba ne’e IX Governu liuhosi SEKOMS kompromete serbisu hamutuk ho klibur ne’e hodi fó formasaun nomós apoia lian jestuál iha televizaun sira.
“Maski sira difisiénsia iha tilun maibé sira mós timor-oan ne’ebé sé de’it iha ninia difisiénsia maibé hakarak kontribui ba dezenvolvimentu nasionál, ne’e ita tenke apresia,” Antigu jornalista akresenta.
Iha biban hanesan, Diretora Ezekutiva KDTTL, Crecência Madeira, hateten, durante ne’e klibur serbisu hamutuk ho lian jestuál, ne’ebé IX Governu hakarak kontinua serbisu hamutuk hodi fó formasaun lian jestuál.
“Tanba ne’e ami kontente tebes hodi kontinua serbisu hamutuk, haree fali ba meta IX Governu nian katak sei la husik ema ida iha kotuk ne’e, signifika katak ita hotu hamutuk mak lori dezenvolvimentu ba nasaun tanba ne’e labele husik ami iha kotuk,” nia tenik.
Jornalista : Antónia Gusmão
Editora : Julia Chatarina
