Top

PAM Baukau lamenta abitante balun ke’e rai-henek no fatuk iha estrada Kelikai

Abitante balun ke'e rai-henek iha estrada área Lawaliu, Suku Baguia, Kelikai, Imajen espesiál

BAUKAU, 17 Novembru 2026 (TATOLI)—Asaun abitante balun ne’ebé ke’e rai-henek no hasai fatuk iha estrada iha área Lawaliu, Postu Administrativu Kelikai, Munisípiu Baukau, hetan lamentasaun husi Prezidente Autoridade Munisipál Baukau, Veneranda Eurico Lemos Martins, tanba bele estraga infraestrutura públika ne’ebé Governu harii.

Veneranda, ne’ebé uluk hala’o kna’ar nu’udár deputada, esplika katak, antes ne’e, estrada iha área referida iha kondisaun aat, no komunidade hamutuk ho autoridade lokál husu Governu sentrál atu halo reabilitasaun hodi fasilita transporte produtu agríkola no asesu ba merkadoria. Maibé, depoizde estrada ne’e hetan hadi’a, ema balun la hatudu responsabilidade tanba sira ke’e rai-henek no hasai fatuk iha estrada sorin-sorin, ne’ebé bele hamosu estragu ba infraestrutura públika ne’e.

“Iha ema na’in-rua ka tolu mak halo hanesan ne’e, laiha responsabilidade. Ita hakilar husu Governu atu halo estrada, maibé ita rasik mak bá estraga fali. Ne’e atitude ne’ebé laiha sentidu pertense,” Veneranda hateten iha Salaun Soimali, Vila Nova, Tersa ne’e.

Lideransa Munisipál Baukau ne’e husu Autoridade Suku no Administradór Postu Administrativu Kelikai atu kontrola no fó-atensaun ba abitante sira iha área referida, tanba tuir nia, hahalok hanesan ne’e bele konsidera nu’udár ofensa hasoru patrimóniu públiku.

“Sira bá halibur fatuk hotu ne’ebé suporta baze estrada ne’e, depoiz ke’e sai atu fa’an. Ne’e atitude ne’ebé laiha sentidu pertense,” Veneranda realsa.

Entretantu, asaun abitante balun ne’ebé ke’e rai-henek no fatuk iha iha área Lawaliu, Suku Baguia, Postu Administrativu Kelikai, sai ona asuntu ne’ebé hetan atensaun iha rede sosiál. Estrada referida liga Kelikai ho Nahareka, Postu Administrativu Ossú, Munisípiu Vikeke, no konstrusaun estrada ne’e ramata iha tinan 2024.

Kontestu

Antes ne’e, Governu liuhosi Ministériu Obra Públika hahú reabilita estrada ne’ebé liga Postu Administrativu Kelikai, Munisípiu Baukau, ho Nahareka, Postu Administrativu Ossú, Munisípiu Vikeke, iha loron 09 Dezembru 2022.

Projetu ne’e hahú ho serimónia lansamentu fatuk dahuluk iha Suku Abafala, Postu Administrativu Kelikai, ho objetivu atu hadi’a asesu transporte no fasilita movimentu komunidade entre munisípiu rua.

Iha 22 Abríl 2024, TATOLI relata katak prosesu reabilitasaun estrada iha área Kelikai to’o Nahareka fó impaktu ba rai-lolon no ameasa uma-lisan hamutuk ualu iha Aldeia Mumana, Suku Abafala, no Aldeia Laualiu, Suku Baguia.

Administradór Postu Administrativu Kelikai, Paulo Jacinto Morreira, informa katak autoridade lokál halo ona koordenasaun ho empreza responsável atu fó-atensaun ba medida protesaun ba uma-lisan hirak-ne’e.

Klik notísia relevante sira iha kraik hodi lee:

  1. PM Taur lansa fatuk dahuluk reabilita estrada Quelicai no Baguia
  2. Estrada Quelicai-Nahareca iha ona prosesu konkursu
  3. Reabilitasaun estrada Quelicai ameasa uma-lisan ualu

Jornalista: Natalino Belo

Editór: Xisto Freitas da Piedade

Publisidade

Leave a Reply

Latest Post

error: Content is protected !!