OÉ-CUSSE, 25 Setembru 2024 (TATOLI) – Komisaun Terra no Propriedade hala’o sensibilizasaun ba Dekretu-lei númeru 5/2020, loron 06 fulan-Fevereiru, kona-ba organizasaun no funsionamentu komisaun no propriedade no Lei númeru 13/2017, loron 05 fulan-Juñu, sobre rejime jurídiku ba definisaun titularidade direitu propriedade bens imóveis ba komunidade iha suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Komisáriu Terra no Propriedade, Romónio Guterres, informa, katak atividade ne’e realiza tanba pedidu husi autoridade RAEOA nian ho objetivu atu esplika kona-ba funsionamentu Komisaun Terra no Propriedade ba populasaun sira, liuliu ba asuntu disputa rai.
“Tanba komisaun ne’e nu’udar entidade ida ne’ené implementa lei rai nian, liuliu esplika Dekretu-lei númeru 5/2020, loron 06 fulan-Fevereiru kona-ba organizasaun no funsionamentu komisaun no propriedade”, Romanio Guterres dehan iha sede suku Costa, ohin.
Aleinde ne’e, espliak plika mós lei kona-ba rejime jurídiku direitu propriedade ba bens imovel. Diploma ne’e hatuur regra sira kona-ba organizasaun funsionamentu no estatutu ba membru sira komisaun rai no propriedade atu oinsá bele rezolve disputa rai.
Notísia relevante: Komisaun A rona MJ oinsá atu rezolve disputa rai
Iha fatin hanesan, Diretór Servisu Terra no Propriedade Oé-Cusse, Júlio Coel, hateten sensibilizasaun matadalan lei sira-ne’e importante, tanba durante ne’e diresaun terra no propriedade iha programa servisu nasionál kadastrál halo ona levantamentu sistemátiku ba rai komunidade iha suku hotu iha Oé-Cusse no dalaruma iha disputa rai.
“Iha prosesu levantamentu ne’e atu prepara ba futuru hodi hetan títulu ba rai, maibé iha levantamentu sira-ne’e mós kazu disputa rai ne’ebé to’o agora husi diresaun terra no propriedade hala’o ona mediasaun balu laiha solusaun. Tan ne’e, ami konvida komisaun mai atu esplika detallu sira-nia knaar, karik kazu sira-ne’ebé mosu iha komunidade sira-nia leet kuandu laiha solusaun, ami bele enkamiña ba parte komisaun terra no propriedade. Tanba ne’e sira-nia servisu atu foti desizaun kona-ba kazu disputa rai nian”, nia hateten.
Xefe suku Costa, Francisco Colo, agradese ba komisaun tanba bele fahe informasaun ba komunidade Costa atu entende di’ak kona-ba lei ba rai no propriedade. Tanba durante ne’e, suku Costa hetan problema barakliu kona-ba asuntu ne’e.
“Ha’u hanoin ida-ne’e oportunidade ba serbisu terra no propriedade atu esplika loloos lei sira-ne’ebé liga ho ita-nia komunidade nia rikeza mak rai atu la’o tuir lei ne’ebé vigora ona. Tanba ne’e, ha’u espera sosializasaun ne’e bele fó klarifikasaun direta ba komunidade atu iha futuru iha problema karik dalan nakloke ba ita hotu nu’udar sidadaun, bele hato’o ba komisaun atu haree”, nia fó hanoin
Iha ámbitu divulgasaun ne’e promove mós diáligu abertu hodi husu no hatán, liuliu ba problema disputa rai iha Oé-Cusse.
Notísia relevante: DNTP Oé-Cusse rekolla reseita $10.535 husi arrendamentu rai no uma Estadu
Jornalista: Abílio Elo Nini
Editora: Maria Auxiliadora
