OÉ-CUSSE, 30 Setembru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, orienta Diresaun Rejionál Infraestrutura (DRI) hodi prepara planta no kadernu enkargu (BoQ, sigla inglés) atu konstrui ponte ida ba mota iha bairru Paut, aldeia Oébaha, suku Bobometo, sub-rejiaun Oésilo.
Instrusaun ne’e halo hafoin eis-Ministru Interiór partisipa iha inaugurasaun monumentu matebian Horácio Tabes, iha aldeia Oébaha, sesta-feira, foin lalais ne’e.
“Ha’u haree mota ne’e fó ameasa ba sira-ne’ebé hela iha sorin ne’e. Tékniku DRI sira tenke prepara BoQ, depois aprezenta mai ha’u atu aprova, depois ita-bele lansa iha konkursu públiku. Ha’u sente fatin ne’e ladún boot ida, ita bele hatama iha projetu emerjénsia tanba ne’e la’ós ponte ida boot”, Rogério Lobato dehan iha Oé-Cusse.
Notísia relevante: Monumentu matebian Horácio Tabes iha suku Bobometo inauguradu
Tuir nia observasaun, komunidade sira-ne’ebé hela besik iha mota referidu ne’e ameasadu, tanba bainhira udan tau bele akontese dezastre no difikulta movimentu transporte no ema, nune’e tenke halo ponte ida kompleta kedan ho muru protesaun.
“DRI halo BoQ atu haree gastu hira, depois ita sei haree tama iha projetu emerjénsia ka la’e? Karik tama ba emerjénsia mós sei liuhusi Governu sentrál, ita ko’alia atu hadi’a povu sira-nia moris. Ne’ebé, ita sei kompleta ho muru protesaun no fó ba ema Oébaha oan sira mak kaer, la’ós lalin ema husi fatin seluk”, nia promete.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Iha biban ne’e, Diretór DRI, Remígio Nuno Sila, dehan sei haruka ekipa téknika sira atu rekolla ona dadus no sukat atu prepara ba BoQ.
“Orientasaun ita hotu rona atu mobiliza ekipamentu pezadu atu normaliza uluk, depois ita sei halo dezeñu atu kalkula orsamentu hira mak sei gasta iha projetu ne’e, tanba ita kategoriza ba projetu emerjénsia. Importante mak bainhira orsamentu iha ona, ha’u-nia hanoin fásil ita-bele ezekuta no implementa projetu emerjénsia ne’ebé orienta ona husi Prezidente Autoridade”, nia hateten.
Xefe aldeia Oébaha, Marcelino Ole, sente satisfeitu ho konstrusaun ponte tanba liga komunidade sira, tanba tinan barak ona bainhira mota tuun, populasaun sira susar hakat bá sorin.
“Estrada ne’e liga rejionál mós, komunidade sira husi Usitasa’e no parte Nítibe inklui Pássabe mos asesu estrada ne’e, ne’ebé kuandu hadi’a entaun liga ona bá ponte Bitopa no ponte Noetoko”, nia espera.
Notísia relevante: Progresu melloramentu estrada foun iha Oésilo atinje 25%
Jornalista: Abílio Elo Nini
Editora: Maria Auxiliadora
