BOBONARO, 30 Setembru 2024 (TATOLI) – Komando Polísia Nasionál Timor-Leste (PNTL), liuhusi Unidade Patrullamentu Fronteira (UPF) atribui, iha ámbitu komemorasaun loron aniversáriu UPF ba da-21, sertifikadu apresiasaun ba jornalista na’in-tolu tanba apoia kobertura ba atividade UPF nian iha liña fronteira.
Jornalista na’in-tolu ne’e mak Humberto dos Santos husi RTTL, E.P destakadu munisipíu Bobonaro, Egidío Nono destakadu Rejiaun Administrativa Espesiál Oé-Cusse Ambeno (RAEOA) no Abílio Elo Nini husi Tatoli, I.P destakadu iha RAEOA.
“Ha’u lori komando nia naran agradese ba jornalista sira, tanba fó sai beibeik ona atividade husi PNTL nian, espesialmente membru UPF sira iha liña fronteira. Ida-ne’e atu hatudu ba ema hotu katak, Unidade Patrullamentu Fronteira sei eziste hodi hala’o nafatin sira-nia knaar”, Komanante-Jerál PNTL, Komisáriu Jerál Hendrique da Costa, dehan iha Mota-Ain.
Notísia relevante: SEKOMS husu PNTL respeita servisu jornalista bainhira halo kobertura iha terenu
Nia fundamenta katak PNTL nia misaun prinsipál mak atu defende legalidade demokrátika, garante seguransa ba ema no sira-nia propriedade no asegura ezersísiu direitu liberdade no garante sidadaun sira-nian tuir Konstituisaun no lei sira.
Tuir lei orgánika PNTL, UPF nu’udar unidade espesiál PNTL nian, fokuliu ba supervizaun no kontrola fronteira nian ba ema no sasán sira-ne’ebé tama no sai, komisaun espesifika ida, patrulla iha fronteira rai nian, iha koordenasaun ho forsa no serbisu sira seluk.
Komandante UPF, Superintendente Polísia Euclides Belo, agradese ba kontribuisaun no kooperasaun di’ak ho serbisu jornalista sira, tanba divulga ona atividade UPF durante ne’e.
“Ha’u hakarak informa iha momentu ne’e katak jornalista na’in-tolu ne’e, ida husi Maliana no Baikeno oan na’in-rua. Durante ne’e ami iha kooperasaun di’ak tebes iha servisu UPF nian iha liña fronteira, tanba ne’e mak ami rekoñese sira-nia dedikasaun ne’e”, nia hato’o.
Tanba ne’e, nia reprezenta Polísia Unidade Patrullamentu Fronteira hodi husu nafatin jornalista sira-nia apoia, nune’e bele mellora liután serbisu UPF iha fronteira.
“Ami husu nafatin ita-bo’ot sira-nia apoia para ami mellora knaar hotu ne’ebé hala’o tinan 20-resin liubá. Agora bá oin ami nafatin ho ita-boot sira, nune’e públiku bele fó hanoin no apoia, depois ami bele hala’o profisaun sai forte no dia’k liu”, nia rekomenda.
Notísia relevante: Komisáriu PNTL propoin ba Governu atu prioriza rekursu umanu iha UPF
Jornalista: Abílio Elo Nini
Editora: Maria Auxiliadora
