COVALIMA, 01 Outubru 2024 (TATOLI) – Servisu Munisipál Konservatóriu Rejistu Notariadu Covalima seidauk simu orientasaun husi Diresaun-Jerál Servisu Rejistu no Notariadu atu halo atendimentu ba sidadaun sira ne’ebé hakarak trata pasaporte.
“Ami seidauk halo atendimentu ba sidadaun trata pasaporte iha munisípiu, maske mákina iha nasionál di’ak ona, maibé seidauk simu orientasaun no hein de’it desizaun”, Diretora Servisu Munisipál Konservatóriu Rejistu Notariadu Covalima, Filomena Gusmão, dehan iha Bairru Rompe, ohin.
Dirijente ne’e lembra katak Notariadu suspende atendimentu pasaporte ba sidadaun hahú iha Fevereiru to’o ohin loron, tanba ne’e funsionáriu sira hein de’it orientasaun atu funsiona fali atividade ne’e tanba sira preparadu.
Notariadu Covalima aleinde atende sidadaun trata pasaporte, halo mós atendimentu ba trata sertidaun RDTL, rejistu kriminál, sertidaun óbitu no billete identidade ne’ebé daudaun ne’e halo impresaun provizória, tanba blanko orijinál limitadu, nune’e presiza halo jestaun ho di’ak.
Tuir dadus, sidadaun ne’ebé trata sertidaun RDTL iha 2024 ne’e hamutuk 1.109, sertidaun kazamentu 20, óbitu 68, billete identidade 3.144 no rejistu kriminál 2.088.
Rekorde katak, iha 2023, sidadaun ne’ebé trata sertidaun RDTL hamutuk 18.355, óbitu 110, sertidaun kazamentu 90, billete identidade 3.165 no rejistu kriminál 1.656.
Sidadaun Melinda de Jesus dehan nia parte trata ona billete identidade iha Notariadu Covalima, maibé fó de’it provizóriu ho suratahan mutin, tanba blanko orijinál limitadu, nune’e fó de’it ba sidadaun sira ne’ebé atu bá eskola iha rai-li’ur.
“Funsionáriu imprime BI provizóriu ba ami hafoin esplika katak bainhira blanko orijinál husi nasionál haruka ona mai tuir pedidu ne’ebé hato’o husi Notariadu, bele imprime ona orijinál ba ita-boot sira no bele foti iha Notariadu”, nia adianta.
Notísia relevante: Notariadu Covalima suspende provizoriamente atendimentu pasaporte ba sidadaun
Jornalista: Celestina Teles
Editora:Maria Auxiliadora
