COVALIMA, 01 Outubru 2024 (TATOLI) – Entre Janeiru no Setembru, munisípiu Covalima ezekuta ona 61,4% husi Orsamentu Jerál Estadu (OJE) alokadu hamutuk millaun $7,3 ba tinan ne’e.
Diretora Servisu Munisipál Finansa Covalima, Rosita Semei Freitas, informa OJE 2024 ne’ebé prevee ba Covalima iha kategoria lima mak hanesan saláriu no vensimentu millaun $2,3, (ezekuta ona 52,2%), bens no servisu $846.885 (ezekuta 60,1%), transferénsia públika millaun $2,6 (ezekuta 60%), kapitál menór $166.820 (ezekuta 74,4%), kapitál no dezenvolvimentu millaun $1,3 (ezekuta 78%).
“Bazeia ba regra ezekusaun Orsamentu Jerál Estadu, kada trimestrál ezekuta porsentu 25. Daudaun ne’e, tama ona trimestre datoluk, hahú Janeiru to’o Setembru ne’e, ezekusaun atinje porsentu 61,4”, Rosita Semei Freitas relata, ohin.
Orsamentu 2024 ba Covalima ne’e finansia programa 13, subprograma 31 ho atividade 74, tuir planu asaun anuál ne’ebé aprezenta husi kada Diresaun Servisu Munisipál nian.
Diretór Servisu Munisipál Obra Públika Covalima, Sidónio Gusmão, dehan Servisu Obra Públika no Transporte ezekuta orsamentu bazeia ba planu asaun 2024 ho totál hamutuk $154.449.
“Ha’u hanoin ezekusaun orsamentu 2024 ba Obra Públika no Trasporte Covalima atu finansia atividade sira hanesan monitorizasaun, implementasaun jestaun parke no atividade sira seluk”, nia realsa.
Rekorde katak, OJE 2023 nia ba munisípiu Covalima hamutuk millaun $5,7 ne’ebé fó prióridade ba programa 11 mak hanesan estrada no ponte ho montante $67.709, dezenvolvimentu rurál no urbana $78.972, seguransa nasionál $105.079, asesu ba justisa $54.368, boa governasaun no jestaun institusionál $2,852.631, agrikultura $528.958, bee no saneamentu $165.441, saúde $244.959, edukasaun no formasaun $1,446.477, igualdade jéneru no inkluzaun sosiál $136.300 no turizmu $57.621.
Notísia relevante: Covalima ezekuta ona 20,5% husi OJE tinan ne’e
Jornalista: Celestina Teles
Editora: Maria Auxiliadora
