DILI, 01 outubru 2024 (TATOLI)—Ministra Edukasaun, Dulce de Jesus Soares, tersa ne’e, halo diálogu ho reprezentante antigu profesór kontratadu hodi hetan konkordánsia ba problema sira.
“Ohin halo diálogu ida nakloke entre Ministériu Edukasaun no antigu Profesór kontratadu sira, ne’ebé nafatin ko’alia kona-ba interpretasaun ligadu ho profesór sira-nia ezijénsia no interpretasaun ne’ebé seidauk kona-malu, maibé nafatin iha oportunidade atu Ministériu no antigu profesór kontratadu sira husi parte legál sira kontinua hasoru malu iha loron hirak sei mai,” Portavós Ministra Edukasaun, Filipe Rodrigues, hateten, hafoin halo diálogu iha salaun enkontru Ministériu Edukasaun (ME), Villa-Verde, tersa ne’e.
Aleinde ne’e, Primeiru-Ministru, Kay Rala Xanana Gusmão haruka karta ona ba ME no hetan ona resposta.
“Ita hein kona-ba solusaun asuntu ne’e la’o ba oin hanusa ne’e ita hein kontaktu husi Ministériu Edukasaun no Primeiru-Ministru hodi rezolve asuntu antigu profesór kontratadu nian. Karta husi Primeiru-Ministru nia konteúdu mak konfidénsiál. Ami ko’alia iha ne’ebá liga ho asuntu legál no asuntu umanu nian,” nia akresenta.
Durante enkontru, parte rua aseita katak hotu-hotu iha konsiénsia hodi aposta kualidade edukasaun.
“Espera katak desizaun ne’ebé sei mai la sees husi aposta kualidade edukasaun iha futuru, no Ministériu Edukasaun sei loke oportunidade ba parte hotu sé de’it mak hakarak sai profesór sei nafatin loke teste bolsa kandidatu profesór ba ema hotu. Maibé ita hein Governu mak sei hola medida,” nia dehan.
Notísia relevante : Antigu profesór kontratadu kontinua ezije ME implementa rezolusaun PN
Iha diálogu ne’e ida-idak aprezenta nia sentimentu durante tempu naruk ne’ebé dedika sira-nia an iha vida profesór nian.
Aleinde ne’e, ME identifika mós katak diretór anteriór sira mak kontribui ba problema balun.
“Edukasaun halo konferénsia nasionál iha tinan 2011, katak profesór hotu ba karreira dosente no ohin ne’e profesór balun hateten katak sira hanorin tempu kleur no ikus mai ita detekta katak profesór balun hanorin iha tempu naruk problema sira ne’e mosu tanba Diretór Edukasaun Munisipál sira iha tempu pasadu ne’e uza buat ida familiarizmu ne’e mak akontese iha kraik, ne’e mak ikus mai profesór sira ne’ebé mak hanorin iha tempu naruk ne’e naran la mai iha Ministériu atu hetan kontratu tanba problema familiarizmu tau naran família lori sa’e mai iha Ministériu, entaun barak mak hanorin kleur maibé la hetan kontratu,” nia dehan.
Iha sorin seluk, Portavós antigu profesór kontratadu, Agostinho Pinto, agradese tanba ME nia odamatan loke ona ba sira hodi solusiona problema ne’ebé sira iha durante ne’e.
“Nune’e ohin ami halo diálogu ba malu. Enkontru ohin ne’e hanesan diálogu inísiu, la signifika hetan kedas rezultadu maibé sei nafatin diálogu aprosimasaun, ha’u hanoin ida-ne’e mak di’ak. Enkontru ohin ne’e la’o di’ak tebes, parte hotu hato’o nia hanoin, Ministériu mós ko’alia katak sei fó oportunidade bele loke tan diálogu atubele aserta solusaun ne’ebé justu ba profesór sira,” portavós relata.
Primeiru-Ministru foin lalais partisipa enkontru iha ONU kona-ba dezenvolvimentu nian, katak labele husik ema ida iha kotuk, tanba ne’e ema hotu kaer metin mensajen saida mak líder sira fó.
“Ha’u hanoin Ministériu sira-ne’e mós hola papel ba ida-ne’e, kona-ba Primeiru-Ministru nia vizaun. Tanba ne’e, ami nu’udar sidadaun nafatin la’o ho saida mak iha diálogu, tanba ne’e apela ba profesór kontratadu sira atu hakmatek hodi hein enkontru tuir mai ho solusaun ne’ebé foti ami sei tuir,” nia katak.
Ho karta ne’ebé Primeiru-Ministru enkamiña mai Ministériu Edukasaun ne’e, nia garante katak sei hetan solusaun ne’ebé justu.
“Ha’u hanoin loron ruma ami sei hetan solusaun ne’ebé di’ak mai ami nu’udar timoroan, esperansa enkontru ohin ne’e bele hetan solusaun ne’ebé justu ba ita hotu. Tanba karta ne’ebé Primeiru-Ministru enkamiña mai iha Ministériu Edukasaun ne’e mak atu solusiona ami-nia problema ne’e,” nia tenik.
Enkuantu, karta ne’ebé mak antigu profesór kontratadu sira enkamiña ba Polísia Nasionál Timor-Leste (PNTL) hodi halo manifestasaun to’o dezembru ne’e provizóriamente suspende tanba ME nia odamatan loke ona ba antigu profesór kontratadu atu rezolve sira-nia problema liuhusi diálogu.
Jornalista : Osória Marques
Editora : Julia Chatarina
