OÉ-CUSSE, 03 Outubru 2024 (TATOLI) – Diresaun Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA) sei orienta empreza konstrutora Afafat Unipessoal Lda atu reabilita fali projetu rezidénsia ba pesoál saúde Nítibe ne’ebé konstrui iha bairru Baoknana suku Bene-Ufe desde 2027 to’o ohin seidauk entrega ba Governu.
Diretór DRI Oé-Cusse, Remígio Nunu Sila, rekoñese katak rezidénsia ne’e kuaze konklui ona, maibé materiál balun hanesan vidru no odamatan komesa aat fali, nune’e persiza reabilita.
“Ha’u ho ekipa teknika bá direita haree ona. Projetu ne’e loloos hotu ona, tanba finaliza husi ita-nia kompañia Afafat”, Remígio Nunu Sila ba jornalista sira iha Oé-Cusse.
Tuir nia koñesimentu kona-ba projetu rezidénsia ba pesoál saúde, katak iha mandatu autoridade anteriór akontese falta komunikasaun entre autoridade ho empreza, nune’e afeta ba konstrusaun sai abandonadu dezde 2017.
“Iha tempu ne’ebá mosu failla uitoan iha komunikasaun ho autoridade anteriór sira, nune’e laiha kontinuasaun, maibé foin lalais ha’u observa ona atu bele halo kontinuasaun. Ami identifika ona katak iha ne’ebá tama kategória reabilitasaun natoon”, nia hateten.
Dirijente Infraestrutura ne’e konfirma molok orienta empreza halo reabilitasaun, sei verifika fali nia orsamentu, tanba projetu ne’e rasik konstrui kedas iha mandatu Prezidente Autoridade dahuluk iha 2017.
“Ami sei haree nia orsamentu tanba antes ne’e orsamentu prevee ona. Ita-bo’ot sira hatene katak projetu sira iha anteriór mak lá prevee orsamentu, entaun ita tenke halo virement ruma hafoin bele halo pagamentu ba iha projetu ne’e rasik, tanba nia orsamentu antes ne’e simu ona 50% ne’e mak to’o agora empreza seidauk entrega”, adianta.
Jornalista Tatoli tenta konfirma asuntu ne’e ho empreza konstrutora Afafat Unipessoal Lda, maibé laiha fatin tanba hala’o serbisu balun iha Dili.
Rekorde katak empreza ezekuta projetu ne’e ho valór kontratu hamutuk $187.406,37 ho durasaun serbisu fulan tolu.
Notísia relevante: Konstrusaun rezidénsia ba pesoál saúde Nítibe iha 2017 seidauk entrega ba Governu
Jornalista: Abílio Elo Nini
Editora: Maria Auxiliadora
