DILI, 08 outubro 2024 (TATOLI) – Diretór Terras Propriedade husi Ministériu Justisa, Lucas da Costa Lopes, dehan ekipa interministeriál ne’ebé kompostu husi Diresaun Terras Propriedade, Ministériu Interiór, ADN, Komandu Jerál PNTL no Autoridade Munisípiu Dili konklui ona levantamentu ba rai hodi konstrusaun infraestrutura polisiál nian.
Konstrusaun infrastrutura polisiál, kompostu husi konstrusaun eskudra foun Nain-Feto iha área Masquerinhas atuál Sede PST, konstrusaun eskuadra foun Vera Cruz iha iha área Farol, konstrusaun Postu Polísia iha Tuana-Laran, konstrusaun ba kazerna PNTL iha área Kintal Boot, konstrusaun ba edifísiu Komandu Jerál PNTL iha Caicoli inklui konstrusaun armajen nasionál PNTL iha Comoro Golgota.
“Rai ba konstrusaun sira ne’e ita identifika ona no foin daudaun ita halo levantamentu hotu ona no rezultadu levantamentu ne’e ema 278 mak sai afetadu ba konstrusaun sira ne’e. Ami hato’o rezultadu levantamentu ne’e ba Komandu Jerál PNTL no Ministru Interiór iha dezembru tinan ne’e, ami sei tun ba halo diálogu karik komunidade sira aseita mak ami haruka loke konta bankaria hodi transfere osan hodi haruka ita-nia komunidade sira abandona fatin hodi ita hahú konstrusaun”, Lucas Lopes hateten iha nia intervensaun bainhira enkontru ho Ministru Interiór no Komandu Jerál PNTL iha sala reunian Komandu Jerál PNTL, tersa, ohin.
Nia dehan, Diresaun Jerál Terras Propriedade, tinan ne’e, rejista konstrusaun infrastrutura barak, tanba ne’e Ministru Justisa Sergio Hornai fó orientasaun katak Diresaun Jerál Terras Propriedade tenke koordena ho Ministériu Interiór no liña ministeriál ne’ebé mak iha hodi halo levantamentu ba rai atu bele implementa obra sira ne’e.
Iha fatin hanesan, reprezentante Ministru Interiór, Asesór prinsipál, Nominado Buras Martins, akresenta Ministériu Interiór iha kompromisu atu hadia infraestrutura durante mandatu IX Governu Konstitusionál.
“Polítika IX Governu nia ne’e klaru, asuntu sira ne’ebé liga ba infraestrutura polisiál nian ne’ebé pendente, ita tenke rezolve hotu iha tinan lima nia laran”, nia adianta.
Nominado lori Ministru Interiór nia naran agradese tebes ba ekipa interministeriál nia servisu ba konstrusaun infraestrutura polísiál, tanba maske hasoru dezafiu maibé konsege halo levantamentu no mós husu ba segundu Komandante Jerál PNTL, Komisáriu Polísia, Pedro Belo, atu halo servisu di’ak.
“Konstrusaun Kuartel Komandu Jerál PNTL ne’e iha komunidade uma-kain haat mak sai afetadu tanba ne’e husu ba ekipa sira tún ba halo diálogu ho komunidade karik, tenke halo ho di’ak, hasai sira tenke ho dignu”, nia dehan.
Xefe Departamentu Planeamentu Komandu Jerál Polísia Nasionál Timor-Leste (PNTL), Asistente Superintendente Polísia Carlito da Silva Adorio, hateten Komandu PNTL hamutuk ho liña ministériu sira konklui ona levantamentu rai ba konstrusaun edifísiu eskuadra PNTL, kazerna polísia, edifísiu ba konstrusaun Komandu Jerál PNTL inklui konstrusaun armajen nasionál PNTL.
Nia dehan, konstrusaun edifísiu Komandu Jerál PNTL no konstrusaun armajen nasionál PNTL ne’e tuir lolos konstrui iha tinan ne’e, tanba dezeñu no Bill of Quality (BoQ) iha ona. Maibé hafoin ekipa tékniku Ministériu Obras Públika no Ajénsia Dezenvolvimentu Nasionál halo avaliasaun ba konstrusaun rua ne’e nota katak presiza hadia tán buat balun molok ba konstrusaun.
“Tuir lolos konstrusaun edifísiu ba Kuartel Jenerál PNTL no konstrusaun armajen nasionál PNTL halo iha tinan ne’e tanba iha ona dezeñu no BoQ, maibé tanba iha dezeñu no BoQ ne’e iha problema, uitoan entaun konstrusaun ita muda fali ba tinan oin”, nia afirma
Nia dehan, problema ba konstrusaun Kuartel Jerál PNTL mak bainhira ekipa MOP no ADN halo verifkasaun ba dezeñu no BoQ mosu aumentu barak iha prosesu konstrusaun inklui haree ba gastu sira la hanesan ona ho saida mak momentu ne’e Ministériu Interiór no Komandu PNTL aseita ona. Tanba ne’e mak ekipa tékniku husi MOP rekomenda ba Ministériu Interiór atu lori fali ba Konsellu Ministru atu halo aprovasaun molok halo konstrusaun.
“Konstrusaun ba Kuartel Jerál PNTL ne’e iha problema liuliu iha nia dezeñu ho BoQ tanba iha ne’ebá mosu aumentu balun iha konstrusaun ne’e, entaun la tuir ona ita-nia base line ida uluk nian no base line ida agora ita iha aumentu orsamentu no buat seluk ne’ebé liga ba kestaun téknika. Entaun ita-nia tékniku sira rekomenda ba Governu tanba, Governu mak iha kompeténsia hodi halo negosiasaun orsamentu”, nia konklui.
Jornalista: Natalino Costa
Editór : Zezito Silva
