DILI, 11 outubru 2024 (TATOLI) – Inspetór Jerál Polísia Nasionál Timor-Leste (PNTL), Superintendente Xefe Polísia, Jorge Monteiro, hateten Komandu PNTL liuhusi Konsellu Superiór Polísia hahú diskute proposta rekrutamentu membru foun PNTL.
“Iha sesaun segunda reuniaun Konsellu Superiór Polísia nian iha parte loraik ne’e sei koalia kona-ba proposta rekrutamentu membru PNTL foun, koalia mós kona-ba promosaun deviza ba membru polísia sira, estabelesimentu Akademia Polísia no estabelesimentu ensinu superiór siénsia polísia”, Superintendente Xefe Polísia Jorge Monteiro, hateten ba jornalista sira Komandu Jerál Cacoli, sesta ne’e.
Nia dehan, proposta rekrutamentu ba membru foun PNTL, Komandu PNTL foin diskute atu iha nivél Konsellu hafoin ida-ne’e, Komandu Jerál PNTL sei lori rezultadu reuniaun ne’e ba Ministru Interiór atu haree no halo desizaun.
“Proposta rekrutamentu ba membru PNTL foun iha faze diskusaun, kona-ba nia mekanizmu rekrutamentu ne’e atu oinsá no oinsá ne’e bainhira Ministru Interiór iha ona desizaun mak Komandu PNTL sei fó sai ba públiku”, nia adianta.
Jorge rejeita ho informasaun ne’ebé mak virál iha rede sosiál facebook foin lalais ne’e katak Komandu PNTL hasai ona rekezitu ba rekrutamentu ba membru PNTL foun.
Jornalista: Natalino Costa
Editór : Zezito Silva
