OÉ-CUSSE, 18 Outubru 2024 (TATOLI) – Ministériu Administrasaun Estatál (MAE), liuhusi Programa Nasionál Dezenvolvimentu Suku (PNDS) iha Rejiaun Administrativa Espesiál Oé-Cusse Ambeno (RAEOA) sei devolve Orsamentu Jerál Estadu kuaze rihun $200 ba kofre Estadu, tanba la ezekuta hotu projetu balun.
Tanba ne’e, Ministru Administrasaun Estatál, Tomás do Rosário Cabral, hala’o sorumutu ho ekipa PNDS Oé-Cusse no xefe suku sira atu avalia projetu PNDS husi 2022 to’o 2024.
“Iha 2023 nian, ohin, ami-nia konsensu katak 23 Novembru ne’e sei entrega [osan]. Ezekusaun orsamentu ne’ebé restu sei fila hotu ba kofre Estadu ba 2024 nian data ikus iha loron 16 Dezembru atu sira prepara fali implementasaun ba 2025. Ne’ebé, tuir sira-nia [PNDS] relatóriu kuaze rihun $200 mak filafali ba kofre Estadu iha fundu poupansa operasionál ne’e ho fundu infraestrutura, tanba infraestrutura nian sei iha hela osan restu ne’ebé la uza”, governante informa ba jornalista sira hafoin enkontru iha Oé-Cusse, kinta ne’e.
Nia esplika razaun seluk devolve osan ba kofre Estadu, tanba projetu balun remata ona, maibé osan sei iha entaun hatama fali ba kofre atu reapropria ba 2025 nian, tanba osan poupansa ne’e atu halo fali projetu balun no tenke haruka ba Ministériu Finansa (MF) hodi envia ba Parlamentu Nasionál (PN), tanba livru ne’ebé aprova iha PN ba projetu foun sira laiha.
Tanba ne’e mak ministru adianta osan sira-ne’e ho montante kuaze rihun $200 haruka fali depois mak realoka ba tinan tuirmai.
Notísia relevante: PNDS Oé-Cusse implementa ona projetu iha suku 18
“Ohin, orientasaun husi MAE ba PNDS sira atu reuniaun espesiál ho xefe suku no fornesedór sira hotu, tanba xefe suku sira foti problema katak fornesedór sira mak atraza, entaun presiza enkontru atu finaliza projetu sira iha Novembru 2024 ne’e”, nia subliña.
Iha fatin hanesan, Diretór PDNS Oé-Cusse, João Bobo, informa katak projetu PNDS iha Oé-Cusse hamutuk unidade 40 – husi 2023 iha 20 no 2024 iha 20. Husi projetu 40 ne’e, iha 17 mak remata ona no falta 23.
Tanba ne’e, nia promete sei esforsu atu finaliza tanba data atu devolve osan husi PNDS Oé-Cusse fiksu ona iha loron 23 Novembru no projetu hotu tenke inaugura.
“Ita sei esforsu tanba tempu sei iha fulan ida. Projetu sira remata hotu halo kedan pagamentu tanba atu dada ne’e data ikus iha loron 23 Novembru no osan ba 2024 iha loron 16 Dezembru, ne’ebé ami sei esforsu tuur hamutuk ho xefe suku no fornesedór sira atu halais projetu sira”, nia afirma.
João Bobo esplika razaun projetu sira la’o tarde, tanba iha problema rua. Primeiru, iha bailoron bainhira traballadór sira iha, fornesedór la hatún materiál, maibé traballadór laiha fornesedór hatún material no saluk mak dalaruma problema bee laiha.
Tuir dokumentu PNDS ne’ebé Tatoli asesu, iha 2023, Oé-Cusse hetan projetu unidade 20 ho totál alokasaun orsamentu husi Governu sentrál hamutuk $212.026,47, daudaun ne’e gasta ona $97.323,75 (45,90%), nia balansu $114.702,72 ho progresu fiziku 86,19%.
Iha 2024, iha projetu 20 ho totál alokasaun orsamentu husi Governu sentrál hamutuk $735.750 no daudaun ne’e gasta ona $224.135,05 (30,46%), balansu $511.614,95 ho progresu fiziku 36,73%.
Nune’e iha 2023 no 2024, PNDS Oé-Cusse hetan projetu 40 ho totál alokasaun orsamentu hamutuk $947.776,47 no oras ne’e gasta ona $321.458,80 (76,37%) no balansu $626.317,67.
Notísia relevante: PNDS lansa fatuk dahuluk ba projetu dada bee-moos ba uma-kain 40 iha Bobokase
Jonalista: Abílio Elo Nini
Editora: Maria Auxiliadora
