DILI, 22 outubru 2024 (TATOLI) – Governu liuhosi Ministériu Juventude, Desportu, Arte, no Kultura (MJDAK), iha kolaborasaun ho Ajénsia Kooperasaun Internasionál Korea (KOICA), hala’o ho susesu, hodi realiza programa formasaun ba treinadór futeból nian juvenil nian hamutuk na’in-22; husi númeru ne’e, mane na’in-15 no feto na’in-hitu iha Kampu Becora, Dili.
Inisiativa ne’e reprezenta komponente xave iha Timor-Leste nia esforsu atu hametin infraestrutura futeból nasaun nian no promove dezenvolvimentu juventude.
MJDAK, Nelyo Isaac Sarmento, hateten, importánsia husi programa ida-ne’e hodi forma paizajen futeból nasaun nian.
Nelyo rekoñese katak Akademia Futeból Timor-Leste dezenvolve ho KOICA nia apoiu, marka kapítulu foun ida ba futeból juvenil. Akademia ne’e la’ós de’it hakarak hadi’a abilidade tékniku sira maibé mós atu haburas respeitu, jogu justu, no dezenvolvimentu karakter entre jogadór joven sira.
“Futeból la’ós de’it kona-ba joga ho jogu furak ida. Ida-ne’e kona-ba kuda valór sira, hanesan respeitu ba ema seluk no auto-dixiplina. Akademia ida-ne’e sei garante katak ita nia jogadór joven sira buras ho kualidade sira-ne’e, hodi prepara sira atu sai modelu iha sosiedade,” Ministru Nelyo Isaac hateten liuhosi nota ne’ebé Agência TATOLI asesu hosi media MJDAK, ohin.
Iha okaziaun ne’e, Ministru Nelyo mós fó sai kona-ba planu atu habelar inisiativa akademia futeból liuhusi estabelese sentru juventude iha munisípiu oioin, inklui Baucau, Lautem, Manufahi, Covalima, no Bobonaro.
Sentru sira-ne’e sei sai hanesan sentru sira hodi haburas talentu futeból joven sira, ho treinadór sira ne’ebé preparadu atu fó mentoria ba jogadór sira la’ós de’it ba kompetisaun, maibé atu kuda valór sira ba moris tomak liuhusi desportu.
“Ami sei loke sentru sira akademia futeból juvenil nian iha munisípiu sira ne’ebé kampu sira eziste ona. Ami-nia treinadór sira sei hala’o knaar krusial ida hodi harii jerasaun atleta sira tuirmai no garante katak Akademia Futeból Timor nian sai hanesan baze ida ba dezenvolvimentu juvenil nian”, Nelyo katak.
Nune’e mós, Adjuntu Country Diretór KOICA Sung Hwan Jang hateten, programa formasaun ne’e reafirma KOICA nia kompromisu atu apoia inisiativa dezenvolvimentu desportu no juventude Timor-Leste nian.
“Parseria ida-ne’e hanesan investimentu ida ba Timor-Leste nia futuru. Labarik sira ne’ebé ita-boot sira sei treinu sei la’ós de’it sai jogadór kualifikadu maibé mós indivídu ho karakter ne’ebé forte, prontu atu kontribui ba nasaun nia dezenvolvimentu,” Jang garante.
Bainhira formasaun ne’e ramata, atividade entre MJDAK-KOICA sei realiza inaugurasaun ba Akademia Futeból Timor iha janeiru 2025. Akademia ne’e, bainhira funsiona, sei foka ba fornese kurríkulu úniku, unifikadu hodi prepara joven futeból sira ba futuru, ho vizaun atu habelar nia impaktu iha nasaun tomak.
Kolaborasaun entre MJDAK no KOICA signifika kompromisu forte atu la’ós de’it promove futeból iha Timor-Leste maibé mós haburas karakterístika no dezenvolvimentu pesoál ba juventude nasaun nian. Ho planu atu habelar akademia futeból iha nasaun tomak, futuru futeból iha Timor-Leste haree nabilan liu duké uluk.
Notísia relevante:KOICA sei entrega kampu multifunsaun haat ba Governu iha agostu
Jornalista: Hortencio Sanchez
Editór: Rafael Ximenes de A. Belo
