DILI, 15 janeiru 2024 (TATOLI) – Ministru Juventude Desportu Arte no Kultura (MJDAK) Nelyo Isaac Sarmento, hateten KOICA sei entrega kampu Becora, Bidau, Kampung Alor no Comoro ne’ebé konstrui iha tinan rua kotuk, ba Governu iha fulan agostu tinan-ne’e.
“Lolos kompaña ho KOICA atu entrega kampu sira ne’e ba Governu iha fulan marsu agora, maibé Governu mak extende tan, dalaruma bele entrega iha agostu nia-laran tanba iha asuntu balun ligasaun ho Governu nian tenke haree hanesan loke bee dalan tanba ida-ne’e la’os sira nian, ne’e parte Governu nian entaun ita sei haree atu halo”, Ministru Nélyo dehan ba Agência TATOLI iha Palásiu Governu, ohin.
Tuir nia, bainhira Governu rezolve ona bee dalan mak empreza bele nahe ona duut ho modelu sintetus iha kampu laran.
“Agora ami sei servisu hela liuliu konfirmasaun ho ADN atu loke konkursu públiku ba kompaña, balun manán bele halo ona servisu hodi loke bee dalan, atu nune’e kompaña ne’ebé kaer projetu ba kampu bele nahe ona duut ho modelu sintetu ne’e”, nia afirma.
Konstrusaun ba kampu hirak ne’e, Becora atinje ona 45,52%, Comoro 81,56%, Kampung Alor 92,81 no Bidau 85,91%.
Kampo haat ne’e halo tanba hetan ajudu finanseiru hosi Governu Korea Súl liuhosi sira-nia Ajénsia KOICA iha Timor-Leste ho montante millaun $2,4-resin ne’ebé konstrui hosi Empreza timoroan CHLN Timor Unipesoal Lda.
Konstrusaun ba kampu haat ne’e Governu no KOICA lansa fatuk da-uluk iha 07 outubru tinan 2022.
Notísis relevante : FOTO ATUÁL: Progresu kampu multifunsaun Becora no Jardin Kampun Alor
Jornalista: Hortencio Sanchez
Editór : Zezito Silva
