VIQUEQUE, 23 outubru 2024 (TATOLI)—Diresaun Nasionál Transporte Terrestre (DNTT) munisípiu Viqueque rekolla reseita $72.948 durante janeiru to’o setembru tinan ne’e.
“Ami rekolla taxa sira ne’e husi atividade inspesaun karreta no motorizada tantu privadu no transporte públiku,” Diretór DNTT munisípiu Viqueque, Saul Henrique, informa ba Agência Tatoli, iha ninia knaar fatin, Beloi, kuarta ne’e.
Nune’e mós, taxa balun mai husi lisensa tránzitu ba karreta mikrolet, angguna no bus, karta kondusaun ba motorista sira tantu karreta no motorizada.
“Ami rekolla taxa balu husi karta kondusaun. Ami loke hodi simu karta kondusaun foun no renovasaun. Ami mós rekolla taxa husi rejista naran ba karreta no motorizada foun sira, inklui infrasaun sira seluk,” nia akresenta.
Notísia relevante : DNTT Viqueque arrekada reseita rihun $16 ba kofre Estadu
DNTT Viqueque foin lalais ne’e simu kandidatu karta kondusaun hamutuk 420-resin, ne’ebé balun tuir ona teste eskrita no teste orál maibé balun maka seidauk partisipa teste.
“Ami hato’o ona pedidu ba parte Diresaun Nasionál hodi fó despaisu ba ami hodi fó teste prátika ba kandidatu karta kondusaun sira, maibé pedidu ne’e seidauk hetan aprovasaun husi Diretór Jerál kona-ba teste prátika kandidatu sira-ne’ebé liu teste eskríita no orál. Nune’e, sei kontinua hein despaisu husi nasionál mai mak ami foin halo teste prátika,” nia tenik.
DNTT Viqueque rekolla reseita iha trimestre dahuluk, kompostu husi janeiru $10.047,50, fevereiru $8.315 no marsu $7.620, ho totál $25.982,50.
Iha trimestre daruak, iha abríl $4.927,50, maiu $4.492,50 no juñu $7.515.00, ho totál $16.935,50.
Nune’e mós, iha trimestre datoluk, iha jullu $11.167,50, agostu $10,160 no setembru $6.703, ho totál $30.030,50.
Funsionáriu na’in-10 DNTT Viqueque daudaun ne’e servisu fó atendimentu ba kliente sira ne’ebé hakarak trata dokumentu transporte.
Jornalista : Vitorino Lopes da Costa
Editora : Julia Chatarina
