DILI, 25 outubru 2024 (TATOLI)—Vise Ministra Finansa (MF), Felícia Claudinanda Cruz, hateten proposta Orsamentu Jerál Estadu (OJE) ba tinan fiskál 2025 ho montante billaun $2.6 ne’e, Governu sei foti hosi fundu petrolíferu billaun $1,566,73,539.
Notísia Relevante: PN konsidera Governu kumpre LEO submete proposta-lei OJE 2025
Nia dehan, OJE 2025 finansia liuhusi konbinasaun reseita doméstika, levantamentu sira husi fundu petrolíferu no fonte sira seluk hanesan ba administrasaun sentrál ho totál billaun $2,72, 980, reseita doméstika Governu sei rekoilla millaun $257,909,61 iha tinan 2025 aumenta 30% kompara ho tinan kotuk, ida-ne’e inklui reseita fiskál sira husi saláriu no impostu sira ba rendimentu no mós reseita sira la’ós fiskál husi venda no serbisu sira.
“Levantamentu husi fundu petrolíferu billaun $1,566,73,539 sei foti husi fundu petrolífeiru ne’ebé kompostu husi Rendimentu Sustentável Estimadu (RSE) millaun $551,949,614 no liu RSE ho billaun $1,9,123,825,” Vise-Ministra Finansa, Felícia Claudinanda Cruz, hato’o iha audiénsia públika ba proposta OJE 2025 ho komisaun C trata asuntu Finansa Públika no D trata asuntu Ekonomia no Dezenvolvimentu iha sala plenária PN, sesta ne’e.
Levantamentu sira-ne’e esensiál ba finansiamentu infraestrutura no programa sosiál sira-ne’ebé dudu kresimentu ekonomiku ba tempu naruk.
Aleinde ne’e, uza balansu kaixa tezouru ka saldu jerénsia hamutuk millaun $200, no utiliza mós emprestimu externu millaun $45 hodi finsansia projetu infraestrutura estratéjiku sira iha pogresu nia laran ne’ebé sei hamosu retornu ekonomika iha futuru, no millaun $9 apoiu orsamentu direita husi Governu Austrália ba iha programa saúde, mobilizasaun laborál no Programa Nasionál Dezenvolvimentu Suku (PNDS).
Ba Rejiaun Administrativa Espesiál Oé-Cusse no Ambeno (RAEOA) ho totál millaun $62,181 uza balasu saldu ka saldo jerénsia hamutuk millaun $51,466,810.
Vise Ministra hateten reseita la’os fiskál rihun $615, 190 no transferénsia husi administrasaun sentrál hamutuk milkaun $10, ba seguransa sosiál ho totál millaun $482, 8, 234, Institutu Seguransa Sosiál (INSS) millaun $166,313,689, kontribuisaun seguransa sosiál millaun $52,665,689, transferénsia husi administrasaun sentrál millaun $124,250, fundu rezerva seguransa sosiál millaun $305,692,545.
Jornalista : Nelson de Sousa
Editór : Cancio Ximenes
