VIQUEQUE, 25 novembru 2025 (TATOLI) – Organizasaun ADRA hahú 2021 establese Grupu kooperativa hamutuk 11 iha munisípiu Viqueque, husi ne’e kooperativa haat maka daudaun ne’e kapitál atinji ona rihun $91,671.89, Jestór Organizasaun ADRA iha Timor-Leste, Ramailo Barreto, relata.
“Ami establese kooperativa hamutuk 12 iha munisípiu Viqueque, maibé ida maka mate ona. Iha kooperativa haat mak progresu dezenvolvimentu kapitál, sira atinji ona $91,671.89. Ho rezultadu ida-ne’e sai istória ba oan sira. Tan ne’e, kooperativa sira hatudu rezultadu ida-ne’ebé di’ak,” Ramailo Barreto, hateten ba TATOLI, iha postu administrativu Viqueque Vila, ohin.
Jestór Ramailo dezafia kooperativa sira atu kontinua mantein hodi hakat ba oin tanba membru kooperativa sira hatene ona kona-ba vantajen no desvantajen husi estabelesementu kooperativa.
“Nune’e ita hotu nian esperansa katak ba futuru kooperativa sira-ne’e sai forte liután, Governu bele suporta (apoia) sira. Durante ne’e ami tau ona ami-nia komitmentu harii sede ba kooperativa no apoia fasilidade ba sira hanesan laptop, printer (impresora) hodi kooperativa sira hala’o sira-nia atividade ekonómika,” jestór ne’e subliña.
Jestór ADRA ne’e haktuir, inísiu 2021 ADRA akompaña sira kooperativa haat ne’e ho kapitál ka orsamentu hamutuk $40,000.00, durante tinan tolu kooperativa haat kapitál sa’e maka’as. Rekursu finanseru ne’ebé boot ona ba kooperativa haat hodi halo movimentu ekonómika ba komunidade sira iha munisípiu ida-ne’e.
“Ha’u enkoraja membru kooperativa sira tenke hamutuk hodi proteje imi-nia kapitál, atu kompete ekonómika iha merkadu hodi atiniji imi-nia mehi hadi’a ekonómia iha família,” Nia enkoraja.
Enkuantu, kooperativa haat ne’e ho atividade produsaun agrikultura no atividade rai no empresta osan.
Tuir dadús husi Kooperativa haat ne’e kompostu husi kooperativa HAMAIFOR ho totál membru na’in-114 ho totál kapitál hamutuk $38,571.03, kooperativa CCTM totál membru hamutuk na’in-39, totál kapitál hamutuk $17,351.70, kooperativa HFF totál membru na’in-38, totál kapitál $9,042.06 no kooperativa MARESBI totál membru hamutuk na’in-73, ho totál kapitál hamutuk $26,707.10.
Iha fatin ketak, Sekretária kooperativa HAMAIFOR, Merlinda da Cruz, haktuir, inisiu kooperativa HAMAIFOR la’o orgamizasaun ADRA maka apoia sede, fasilidade produsaun mina nuu no formasaun, fundu ADRA la apoiu. Fundu ne’ebé kooperativa iha membru sira rai osan hamutuk, iha inísiu kooperativa ho kapitál $1,000.00.
“Durante ne’e la’o, hahú 2021 to’o agora, ami-nia fundu ne’ebé ami rai iha kooperativa iha rihun $38 resin, husi fundu ne’e ami membru maka iha diretu atu halo empresta,” nia haklaken.
Alende ne’e, nia reforsa, “osan ami mós halo produsaun mina nuu. Nune’e ha’u sente atividade kooperativa ne’e fó vantajen di’ak ba ami tanba ami kuandu hasoru problema ba finansiamentu, ami foti fila fali ami-nia osan mak selu fali. Desvantajen ne’ebé ami hasoru maka dala ruma membru sira impresta osan, hatama fali kle’ur mak hatama”.
Maibé, tuir sekretária ne’e katak sira-nafatin iha kompromisu ba atividade kooperativa ne’e tanba benifísia sira-nia moris.
Jornalista : Vitorino Lopes da Costa
Editór : Rafael Ximenes de A. Belo
