DILI, 22 janeiru 2025 (TATOLI)-Diretór Ensinu Báziku Terseiru síklu 10 Dezembru Komoro, Calisto Guterres, husu ba Ministériu Edukasaun (ME) toma atensaun ba okupante aredór eskola ne’ebé halo fatin-hela hodi fó aluga ba ema seluk.
“Tinan naruk ona komunidade hela iha ne’e, foufoun profesór sira mak hela maibé tuir mai nia família sira mai tuir tan entaun hahú barak, ikus sira hela metin iha laran hodi halo tan uma”, nia dehan ba jornalista iha ninian knaar fatin.
Ho prezensa ne’e, nia dehan prosesu aprendizajen prejudikadu ho movimentu la’o bá-mai durante atividade eskola-nian.
Hanesan dirijente haktuir eskola hahú formatura iha tuku 7.45 no tuku 8.00 ne’e hakarak portaun taka durante prosesu aprendizajen to’o loke hikas bainhira termina ona aula iha tuku 12.30. Maibé, hakarak ida ne’e la akontese tanba prezensa komunidade iha aredór eskola.
Notísia relevante: Komunidade okupa arredór Eskola EBC 10 Dezembru prejudika prosesu aprendizajen
Calisto Guterres dehan, karta sirkular husi Ministériu Edukasaun hatún ona ba sira iha 2022 maibé to’o agora laiha kontinuasaun, entaun komunidade sira-ne’e la preokupa hodi kontinua halo uma iha laran.
“Iha 2022 ne’e uma-kain 15 de’it, maibé tinan ida-ne’e uma-kain hamutuk 20-resin mak iha ne’e, entaun barak tan de’it”, informa.
Calistro hatutan, komunidade ida fó aluga uma ba ema seluk ne’e profesór ida, maibé nia la hanorin iha eskola 10 Dezembru, mais hanorin iha eskola Sekundáriu Jerál Finantil. “Ami aprosima ona ho nia, no nia dehan prontu husik fatin ne’e, maibé tenke hasai ho dignu no kria kondisaun. Agora kondisaun ne’e sé mak atu kria, nune’e ida-ne’e ami entrega fila fali ba superior sira oinsá atu rezolve problema ida-ne’e”.
Diretór Servisu Edukasaun Munisípiu Dili, Sabino da Costa Pereira, hatete daudaun ne’e halo hela aprosimasaun ho okupante sira atu hamamuk fatin. Nia hatutan tan, ME la prevee verba ba indemnizasaun bainhira haruka okupante sira halo mamuk fatin.
Okupante sira ne’e, nia dehan durante tempu naruk la halo arrendamentu ba Estadu.
Notísia relevante: ME husu komunidade okupa arredór eskola prepara-aan hamamuk fatin
Jornalista : Osória Marques
Editór : Zezito da Silva
