OEKUSI, 11 Fevereiru 2025 (TATOLI)– Sekretária Rejionál Edukasaun no Asuntu Sosiál, Inácia Tamele, relata, iha tempu badak, selebra akordu kooperasaun ho Institutu Defeza ba Direitu Labarik (INDDICA, Sigla portugés), atu proteje traballador infantil liuliu tau-matan ba Oekusi-oan ho idade minoridade ne’ebé abandona eskola no kontinua fa’an sasán iha Dili.
“Atu iha liña koordenasaun servisu di’ak entre INDDICA ho Autoridade RAEOA, daudaun parte jurídiku elabora no revee hela akordu kooperasaun, nune’e iha tempu badak dalaruma sei asina akordu ne’e,” Inácia Tamele, informa iha Oekusi, ohin.
Notísia relevante:INDDICA preokupa labarik barak hosi Oé-Cusse fa’an sasán iha Dili
Iha 2024 INDDICA konsege dezloka Oekusi-oan na’in-rua husi Dili mai Oekusi atu kontinua estudu, maibé to’o agora seidauk identifika loloos sira-nia identidade no rezidénsia.
“Tinan kotuk ami ko’alia ona, maibé to’o agora ami sei buka labarik sira-ne’e, eskola iha ne’ebé no husi suku ne’ebé, tanba mumentu ne’ebá, ha’u husu sira (INDDICA) seidauk fó dadus kompletu atubele hatene sira eskola ka la’e ka kontinua fali fa’an sasán iha Dili,” nia afirma.
Sekretária Rejionál ne’e mós apela ba inan-aman no autoridade lokál sira atu labele husik labarik sira ho idade minoridade la’o do’ok. Bainhira la’o do’ok presiza hetan autorizasaun husi inan-aman.
“Tanba durante ne’e ema barak duun ba governu mak sala, maibé loloos inan-aman mak tenke iha responsabilidade másimu ba labarik sira, labele husik sira ba Dili hodi buka osan, maibé tenke haruka ba eskola tanba labarik iha de’it direitu atu bele eskola, estuda, halimar no hetan tratamentu saúde ne’ebé dignu”, nia apela.
Iha biban hanesan, Prezidente INDDICA, Dinorah Granadeiro, relata antes ne’e INDDICA selebra ona akordu ofisiál maibé termina ona, nune’e presiza fali akordu foun.
“Ami iha ona komunikasaun ho Sekretária Rejionál Edukasaun no Asuntu Sosiál, atu renova akordu ne’ebé uluk halo ona iha governu anteriór, kona-ba oinsá atu akomoda labarik sira-ne’ebé kontinua faan hela sasán iha kapitál Dili. Ami espera katak ho renovasaun ne’e labarik sira-ne’e ami bele akomoda sira no balun ami transporta daudaun sira balun fila mai ona iha Oekusi hamutuk na’in-rua, ita fasilita sira hamutuk ho MSSI no Ministériu Edukasaun atu fila ba eskola,” nia afirma. .
Notísia relevante:INDDICA koordena ho APORTIL kontrola labarik Oé-Cusse halo viajen mai Dili
Jornalista: Abílio Elo Nini
Editór: Florencio Miranda Ximenes
