DILI, 19 Fevereiru 2025 (TATOLI)-Autoridade Munisípiu Dili (AMD) planeia halo kontratu ba kamioneta raut lixu hamutuk 75, bainhira kamiaun 50 termina akordu iha Fevereiru nia rohan.
“Kamioneta 50 nia durasaun kontratu ne’ebé AMD kontratu ne’e termina iha Dezembru 2024, maibé iha loron 1 Janeiru to’o Fevereiru tinan ne’e, Ministériu Administrasaun Estatál (MAE) liuhusi Sekretáriu Estadu Asuntu Toponimia no Organizasaun Urbana mak kontrata fali hodi rekolla lixu iha kapitál Dili”, Xefe Departamentu Saneamentu Munisípiu Dili, Domingos Soriano, dehan iha knaar fatin, Matadouru, kuarta ne’e.
Tanba ne’e mak AMD hahú halo preparasaun konkursu foun ba kamioneta hamutuk 75, ne’ebé tuir informasaun sei públika iha 01 Marsu.
Prezidente Interinu Autoridade Munisípiu Dili, António Augusto Guterres, hatutan: “Fevereiru nia rohan, ministériu sei la halo kontratu no sei kontinua fali hosi Autoridade Munisípiu Dili”, katak nia.
“Ministru aseita tebes-tebes, orienta AMD kria kondisaun oinsá para kontratu fila-fali kamioneta ne’ebé ami husik iha Fevereiru nia rohan. Entaun ita la kontinua kontratu sira iha ministériu maibé ita fó oportunidade ba empreza lokál hodi bele halo servisu raut lixu no ida-ne’e sei kontrata iha Marsu, ne’e hosi AMD”, dehan.
Notísia relevante: Empreza Labilay iha kamioneta 26 rekolla lixu iha kapitál
Jornalista : Osória Marques
Editora : Rita Almeida
