DILI, 19 Fevereiru 2025 (TATOLI)—Konsellu Imprensa (CI, sigla portugés) hamutuk ho Programa Nasaun Unidu ba Dezenvolvimetu (UNDP, sigla inglés), kuarta ne’e, finaliza ona formasaun ‘Media Debate Training on Democracy’ ba jornalista na’in-30 iha etapa dahuluk.
Ekipa CI ho apoiu husi Fasilitadór internasionál, Firmansyah Syamsi Hamdani, realiza formasaun durante loron-tolu, hahú 17 to’o 19 Fevereiru.
Diretór Analista no Dezenvolvimentu Mídia CI, Alberico da Costa Junior, iha esperansa formandu sira bele implementa matéria ne’ebé simu ona iha ida-idak ninia serbisu jornalizmu.
“Ha’u hanoin buat ne’ebé sira hetan ona hanesan skill no koñesimentu liga ho Media Debate ne’e, sira iha oportundiade hodi implementa fali, maski ida-ne’e depende ba kada redasaun atu nune’e bele aproveita saida mak sira apreende ona,” Diretór Alberico Junior, hato’o iha salaun João Paulo II, Komoro, kuarta ne’e.
Notísia relevante : CI-UNDP fasilita Media Debate Training on Democracy ba jornalista 30
Formasaun ne’e realiza tanba koperasaun serbisu entre CI, UNDP no Rádiu Televizaun Timor-Leste, Empreza Públika (RTTL, E.P) ne’ebé hanesan benefisiáriu prinsipál maibé koko hodi halibur mós jornalista sira husi mídia seluk.
Iha parte seluk, Diretór ne’e konsidera rekomendasaun sira husi jornalista, ne’ebé husu atu formasaun ne’e bele kontinua nafatin, maibé jestór mídia sira presiza koopera ho CI nune’e bele garante profesionalizmu ba jornalista atu hala’o papél kontrolu sosiál.
“Media Debate ne’e 50% mai husi RTTL no treinamentu sira ne’e sei la para, formasaun saida de’it mak rezultadu husi kooperasaun ho ajénsia internasionál ne’ebé kontribui ba Planu Asaun CI nian, ita nafatin halo para garante profesionalizmu ba ita-nia jornalista. Parte mídia mós tenke koopera di’ak tanba mídia balun difísil atu koopera,” nia informa.
Iha biban hanesan, Fasilitadór, Firmansyah Syamsi Hamdani, sente orgullu ba partisipante sira-nia entuziasmu no vontade apreende iha etapa dahuluk.
“Importante liu mak imi apreende ona hodi implementa, bele ba iha mídia ne’ebé imi serbisu ou iha futuru karik imi iha hanoin halo podcast no hetan oportunidade lidera talk show ruma, maibé di’ak tebes durante loron-tolu bele apreende ho di’ak. Ha’u sei iha tan loron-tolu iha ne’e ba etapa daruak nian,” nia dehan.
Matéria hirak ne’ebé lori iha formasaun ne’e mak hanesan dezeña debate talk show iha mídia, estratejia atu hakalma situasaun, konklui debate: matadalan prátika ba entrevistadór, debate iha televizaun no rádiu, tipu pergunta oin-oin inklui prátika direta oinsá bele lori programa talk show.
Formandu, Natalina Araújo, ne’ebé mai husi Mídia Rádio Liberdade, agradese ba oportunidade tanba matéria hirak ne’ebé Fasilitadór fahe ona bele dezenvolve nia kareira jornalizmu.
“Formasaun hotu ne’e di’ak, maibé ba oin tenke ho prátika barak liután tanba balun la konsege prátika direta maibé husi ne’e ami bele apreende liután. Ha’u agradese ba ida-ne’e,” nia katak.
Media Debate Training on Democracy ba etapa daruak sei hahú iha loron 20 to’o 22 Fevereiru, ho partisipante 30, ne’ebé partisipante 50% husi RTTL no seluk husi mídia nasionál hanesan Lifau Press, Independente, STL, Gardamor TV, Rádio Labeh, Lafaek News, GMN, Rádio Liberdade, MDT, Hatutan, SapNews no TATOLI.
Jornalista : Cidália Fátima
Editora : Julia Chatarina
