DILI, 26 Fevereiru 2025 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P), halo inspesaun ba armazein empreza sira hanesan Lisun, Perfecto, Kreativu Furak no Timor Food, detetadu maioria foos ho masin-midar estragadu.
“Ekipa AIFAESA identifika foos no masin-midar ne’ebé estragadu iha empreza sira hanesan iha Lisun foos estragadu hamutuk saka 2.511, iha empreza Perfecto masin-midar saka 800, iha empreza Kreativu Furak foos saka 40 no Timor Food foos saka 300-resin,” Diretora Operasionál AIFAESA, Claudina Soares Pinto, informa ba jornalista sira iha armazein Timor Food, Bidau Akadiruhun, kuarta ne’e.
Nia dehan, inspesaun ne’e ba alimentár no mós la’ós alimentár, entaun ida-ne’e ekipa sira halo liuhusi koordenasaun ho empreza sira nune’e bele halo destroisaun.
“Foos iha armazein Lisun hamutuk saka 2.511 ohin ekipa halo uluk destroisaun iha lixeiru Tibar,” nia haktuir.
Nia hatutan, sasán ne’ebé mak estragadu no espiradu, empreza sira tenke resposabiliza hodi selu koima ne’ebé mak AIFAESA aplika ba sira.
Notísia relevante: AIFAESA inspesiona loja lubuk iha Dili
Antes ne’e, Autoridade Inspesaun Fiskalizasaun Atividade Ekonómika Sanitária no Alimentár (AIFAESA), mós taka provizória empreza Perissos no rekomenda bá empreza atu hadi’a kondisaun ijiene, tanba produtu sira barak mak hetan estragu no espiradu.
“Ami mai halo inspesaun haree kondisaun ijiene ladi’ak. Foos barak mak hetan estragu (fohuk no metan hotu). Entaun, ami taka provizória to’o fulan ida (hahú husi data inspesaun). Ha’u husu bá empreza Perissos presiza hadi’a kondisaun ijiene no presiza halo jestaun ne’ebé di’ak, hodibele organiza katak produtu sira ne’ebé mak hanesan espiradu tau ketak, estragadu tau ketak no produtu ne’ebé mak di’ak tau ketak, tanba ita haree katak produtu sira-ne’e tau hamutuk to’o balun sai aat hotu,” Diretora Operasionál AIFAESA, Claudina Soares Pinto, hateten bá TATOLI iha Aimutin, tersa (18/02/2025), bainhira halo inspesaun bá empreza referida.
Jornalista: Felicidade Ximenes
Editór: Xisto Freitas da Piedade
