OEKUSI, 24 Marsu 2025 (TATOLI)–Iha trimestre dahuluk husi fulan-Janeiru to’o Marsu 2025 ne’e, Diresaun Rejionál Terra no Propriedade (DRTP) liuhusi Servisu Kadastru, Rejiaun Administrativa Espesiál Oekusi Ambeno (RAEOA) kosege arrekada reseita ba kofre Estadu hamutuk $11,299.00 mai husi arrendamentu rai no rezidénsia uma Estadu nian.
Diretór DRTP Oekusi, Júlio Coel, relata taxa ne’e rekolla husi arrendatáriu sira liuliu balun uza rai Estadu no uma atu hela, balun uza ba negósiu no balun halo investimentu seluk.
Notísia relevante:DNTP Oé-Cusse rejista kazu disputa rai 56
“Reseita ne’ebé iha arrendátariu sira mai foti resibu no bá depozita iha banku BNU. Nune’e iha Janeiru ita iha ona $4,125.00, fulan Fevereiru ita rekolla $3,709.00, fulan Marsu to’o data ohin balu selu ona hamutuk rihun $3-resin, ne’ebé totál trimestre dahuluk $11,299.00,” Júlio Coel hateten iha Oekusi, ohin.
Tuir kontratu arrendamentu, nia esplika bainhira arrendatáriu selebra ona kontratu ho Estadu no la kumpre kontratu referidu ka tarde halo pagamentu bele fó sansaun ka hapara kontratu no bele fó 50% husi valór kontratu mensál nian.
Nune’e totál arrendatáriu iha Oekusi hamutuk 200-resin, maibé daudaun sira-ne’ebé selu ona mak 100-resin tanba balun pagamentu tarde, dalaruma fulan-rua ka tolu mak foin selu dala ida.
“Taxa ne’ebé ho valór bo’ot mak husi banku BRI tanba selu fulan ida $696,00, ami iha ona koordenasaun atu selu hahú iha tinan kotuk mai to’o Marsu 2025 ne’e, maibé sira propoin no hato’o ona karta ba Prezidente Autoridade atu osan ne’e rai de’it iha banku BRI, ne’ebé agora daudaun ne’e atinje ona rihun $22,” nia hateten.
Iha fatin hanesan, Fernando Nono, nu’udar arrendatáriu, husi sub-rejiaun Nítibe, sente orgullu tanba fatin ne’ebé hela ho justu, nune’e iha obrigasaun atu kontrui ba Estadu.
“Ha’u hela iha uma Estadu, kada fulan ha’u sempre selu dolár $10 tanba ha’u mai husi área rurál, ne’ebé fatin ne’e ha’u hela, sente justu uitoan, tan ne’e mak ha’u tenke kontribui ba Estadu, nune’e bele hela ho hakmatek la’os hela ho gratuita,” nia dehan.
Relasiona ho kontratu arrendamentu sira-neʼebé uza uma no rai Estadu uza lei númeru 01/2003, loron 10 fulan-Maiu no nia implementasaun utiliza dekretu-lei númeru 19/2004, loron 29 fulan-Dezembru.
Notísia relevante:Terra Propriedade sei regulariza didi’ak arrendamentu rai Estadu iha Oe-Cusse
DNTP Oé-Cusse enkamiña kazu tolu sobre disputa rai ba Terra no Propriedade
Jornalista: Abílio Elo Nini
Editór: Florencio Miranda Ximenes
