DILI, 20 Marsu 2025 (TATOLI)-Prezidente Repúblika, José Ramos Horta, simu delegasaun konselleiru ne’ebé reprezenta komunidade portugés sira iha Ázia no Oseánia.
Durante hasoru malu, konselleiru sira propoin projetu kolaborativu oioin, inklui interkámbiu edukativu sira ne’ebé sei permite estudante timoroan sira hodi estuda lian-portugés iha universidade sira iha Makau.
Enkontru ne’e koinside ho reuniaun Konsellu Rejionál dahuluk hosi Komunidade Portugés hosi Ázia no Oseánia ne’ebé hala’o iha Dili loron 20 to’o 21 fulan-Marsu hodi marka ba dahuluk mak Timor-Leste sai uma-na’in ba enkontru hanesan ne’e dezde hetan reprezentasaun iha konsellu iha tinan 2023.
“Delegasaun ne’e inklui reprezentante sira husi Timor-Leste, Austrália, Makau, no Xina, ne’ebé espresa ami nia kompromisu atu hametin ligasaun kulturál no linguístika iha rejiaun tomak”, Konselleru komunidade portugés iha Timor-Leste, Filipe Silva, hateten ba jornalista sira hafoin enkontru ho Prezidente Repúblika iha Palásiu Prezidensiál.
Enkontru ne’e konselleiru sira destaka relasaun istóriku sira entre Portugál, Timor-Leste, Makau, no Austrália, hodi subliña sira-nia hakarak atu kolabora iha inisiativa sira ne’ebé promove lian no kultura portugés iha Ázia no Oseánia tomak.
Sira husu Prezidente nia apoiu hodi fasilita atividade kulturál sira no haburas kooperasaun entre komunidade portugés iha nasaun oioin iha rejiaun.
Prezidente Ramos Horta simu sira-nia inisiativa no enkoraja konselleiru sira atu dezenvolve atividade sira ne’ebé promove interkámbiu kulturál no destaka relasaun istórika sira entre Portugál no Timor-Leste.
Prezidente dezafia delegasaun hodi kria projetu sira ne’ebé sei hametin prezensa kulturál portugeza iha rejiaun, reforsa kna’ar Timor-Leste nian hanesan reprezentante hosi Komunidade Nasaun Ko’alia Lian Portugés (CPLP-sigla portugés) iha Ázia.
Jornalista : Hortencio Sanchez
Editora : Rita Almeida
