DILI, 03 Abríl 2025 (TATOLI)–Juiza Administradora Tribunál Judisiál Primeira Instánsia Dili (TJPID), Edite Palmira dos Reis, hateten tékniku husi empreza China International Economic Cooperation Group CO, Ltd hahú hadi’a edifísiu foun Tribunál Dili.
Juiza Edite haktuir katak antes ne’e Parlamentu Nasionál liuhusi Komisaun A hala’o vizita ona hodi identifika edifísiu Tribunál Dili hafoin inauguradu iha 6 Dezembru 2024 no utiliza kedas, maibé iha utilizasaun ne’e kondisaun balun edifísiu foun Tribunál nian komesa aat tanba udan maka’as bee tama, parede balun hahú rahun inklui odamatan balun aat ona.
“Defaktu iha duni buat balun komesa aat hanesan edifísiu bee tama inklui iha tan seluk-seluk. Parlamentu mós mai vizita haree duni ida-ne’e. Maibé, sira (empreza) komesa hadi’a ona buat sira-ne’ebé bee penetra tama, didin sira-ne’ebé metan hotu ne’e sira komesa hadi’a ona,” Edite ba jornalista sira iha nia kna’ar fatin, Tribunál Judisiál Primeira Instánsia Dili, Kaikoli, kinta ne’e.
Rekorda fali katak edifísiu foun Tribunál Dili hahú ninia konstrusaun iha 2020, ne’ebé konstruidu husi empreza China International Economic Cooperation Group CO, Ltd ho valór orsamentu millaun $11.
Empreza China International Economic Cooperation Group CO, Ltd konklui obra ne’e iha Novembru 2024 no iha loron 6 Dezembru 2024 edifísiu referidu hetan inaugurasaun husi Prezidente Repúblika, José Ramos Horta.
Jornalista: Natalino Costa
Editór: Xisto Freitas da Piedade
