VIKEKE, 09 Abríl 2025 (TATOLI)—Diresaun Nasionál Rejistu Notaridadu (DNRN) munisípiu Vikeke prodús ona pasaporte hamutuk 237 iha trimestre dahuluk 2025.
“Kona-ba atendimentu pasaporte iha munisípiu Vikeke husi fulan Jeneiru to’o Marsu, ami prodús ona abitante sira-nia pasaporte foun no halo renovasaun hamutuk 237,” Diretór Nasionál Rejistu Notaridadu munisípiu Vikeke, Rogério da Costa, hateten ba Agência Tatoli, iha ninia knaar fatin, Beloi, kuarta ne’e.
DNRN Vikeke halo mós oráriu ba atendimentu trata pasaporte ho ninia limitasaun kada loron.
“Atendimentu ba pasaporte ne’e ami kria órariu kada fulan atende dala-neen, ne’ebé kada loron atende ema na’in-10 maibé dalaruma bele to’o 20, konforme abitante sira mai liu númeru ne’e ami atende sira,” nia akresenta.
Notísia relevante : Komunidade Bobonaru preokupa ho oráriu atendementu pasaporte
Iha mós tarifa ne’ebé aplika ba emisaun pasaporte inklui ninia durasaun ba foti dokumentu.
“Iha ne’e kustu $50 ne’ebé abitante sira atu trata pasaporte sira ba selu direta iha banku, depois lori resibu ba ami, hafoin ami prosesa. Nune’e, ba durasaun prosesa pasaporte ne’e depende, kuandu emerjénsia ami fó nota ba abitante sira ba simu direta pasaporte iha Dili. Maibé bainhira la’os emerjénsia, bele simu pasaporte iha Vikeke semana ida ka rua,” Diretór esplika.
Tuir dadus totál pasaporte hamutuk 237, atendimentu kada fulan hahú husi Janeiru emite pasaporte foun hamutuk 79 ho kustu $3.950, renovasaun pasaporte hamutuk 18 ho kustu $900.
Iha fulan-Fevereiru, emisaun pasaporte foun hamutuk 69 ho kustu $3.450 no renovasaun pasaporte 15 ho kustu $750.
Iha fulan-Marsu emisaun pasaporte foun hamutuk 47 ho kustu $2.350 no renovasaun pasaporte hamutuk sia ho kustu $450.
Funsionáriu DNRN munisípiu Vikeke daudaun ne’e hamutuk na’in-14, kompostu husi diretór no funsionáriu.
Jornalista : Vitorino Lopes da Costa
Editora : Julia Chatarina
