BOBONARU, 17 Abríl 2025 (TATOLI)—Diresaun Konservatóriu Servisu Rejistu Notariadu (DKSRN) munisípiu Bobonaru, to’o ágora seidauk deside atu halo implementa programa Rejistu movél iha postu administrativu Kailaku, Bobonaru no postu administrativu Loloto’e tanba enfrenta problema haat hanesan orsamentu limitádu, transporte, liña Internet no menus rekursu umanu.
Program ne’e implementa atu hakbesik servisu adminsitrasaun ba baze hodi fasilita idozu no Ema ho Defisiénsia (EhD) sira asesu dokumentu importante sira, tanba kestaun distánsia no saúde la permite sira mai direta trata dukumentu iha edifisíu DSKRN munisípiu Bobonaru.
Diretór DKSRN Munisípiu Bobonaru, Marciano Mali Loe, hateten programa ne’e DKSRN planeia atu implementa ona maibé tanba hasoru problema oioin to’o ágora seidauk deside data fiksu.
Notísia Relevante: Notariadu Bobonaro halo rejistu movél ba idozu-EhD iha Maliana-Cailaco-Bobonaro-Loloto’e
“Agora dadauk problema ho orsamentu uitoan. Ha’u ba koordena ho Diretór Jerál dehan ita-nia orsamentu problema hela, depois foin lalais ita mós halo manutensaun Sistema. Entaun, ita atu halo rejistu movél liña mós problema tanba ita atende iha kapitál Munisípiu de’it araska, satán ba postu ne’e ha’u sente araska,” Nia informa ba jornalista sira, iha kna’ar fatin, kuarta ne’e.
Aleinde ne’e problema seluk fali ne’ebé DKSRN Munisípiu Bobonaru hasoru mak menus rekusu uma liuliu transporte tanba to’o agora laiha karreta ho motorizada ida no durante ne’e Autoridade Munisípiu Bobonaru mak apoia karreta hodi fasilita ekipa sira halo atividade rejistu movél iha terrenu.
Maibé, Diretór Marciano afirma problema ne’e la sai obstakulu atu implementa programa Rejistu movél iha suku.
“Ha’u sei tenta nafatin ho diresaun jerál no ita-nia Autoridade Munisípiu sira, oinsá buka dalan para ita bele to’o iha postu sira hodi emite dukumentu ba ita nia-maluk sira liuliu ema ho defisiénsia sira no idozu tanba sira dezenaraska atu asesu mai kapitál munisípiu,” nia dehan.
Enkuantu iha tinan 2024, liuhusi programa rejistu movél DKSRN Munisípiu Bobonaru konsege emite ona BI no Sertidaun Nasimentu ba EhD no Idozu na’in-909 iha postu administrativu Atabae no Balibo.
Notísia Relevante: Komunidade kestiona Notariadu Bobonaro kona-bá sistema atendimentu BI no Sertidaun RDTL
Jornalista : Sergio da Cruz
Editór : Cancio Ximenes
