DILI, 23 Abríl 2025 (TATOLI)—Parlamentu Nasionál (PN) timoroan sei sai uma-na’in hodi realiza reuniaun Komisaun Ekonomia, Ambiente no Kooperasaun ba Asembleia Parlamentár Komunidade País ho Lian Portugés (AP-CPLP, siglá portugés) durante loron-rua, 24-25 Abríl, iha Timor-Leste.
Tuir ajenda ne’ebé Agência Tatoli asesu husi mídia Parlamentu, ohin Deputadu ho nia delegasaun husi nasaun membru CPLP to’o ona Dili.
Iha loron dahuluk, iha 24 Abríl dadeer, delegasaun sei hala’o enkontru kortejia ho Prezidente Parlamentu Nasionál, Maria Fernanda Lay no reuniaun Komisaun rua AP-CPLP.
Notísia relevante : PN Timor-Leste partisipa konferénsia UIP iha Genebra
Aleinde ne’e, ko’alia tópiku kona-ba ‘Importánsia relasaun entre CPLP no ASEAN’, ne’ebé sei iha intervensaun husi reprezentante kada país membru, halo diskusaun no debate.
Hafoin iha parte meudia, sei ko’alia mós tópiku kona-ba ‘Barreira Komersiál no Oportunidade Integrasaun Ekonómika iha País CPLP.
Ajenda iha loron 25 Abríl sei halo rezumu serbisu iha loron dahuluk.
Hafoin delegasaun sei halo vizita ba Arkivu Muzeu Rezisténsia, Institutu Públiku (AMRT, I.P) no merkadu Taís Kolmera, hafoin sei kontinua fali serbisu liga ho trata asuntu kona-ba proposta no define reuniaun iha tempu tuir mai.
Iha 26 Abríl, delegasaun husi país membru CPLP sei filafali ba ida-idak nia nasaun.
Jornalista : Nelson de Sousa
Editora : Julia Chatarina
