KOVALIMA, 24 Abríl 2025 (TATOLI) – Organizasaun Klibur Dezenvolvimentu Sustentavel Timoroan (KDESTO) Kovalima hamutuk ho Sentru Solidariedade Sosiál no Inkluzaun Kovalima, iha 2024 ne’e, disponibiliza ona nesesidade bázika ba Ema ho defisiénsia (EhD) hamutuk na’in-550, iha munisípiu Kovalima.
Diretór KDESTO Alfredo dos Santos esplika, Organizasaun KDESTO fó apoiu bazeia ba submisaun karta pedidu ba iha Sentru solidariedade sosiál no inkluzaun (SSSI) iha munisípiu Kovalima.
“Ami submete pedidu ba Sentru solidariedade sosiál bazeia ba dadus assesment (avaliasaun) hodi haree kondisaun direta ba ema ho defisiénsia liuhusi programa ita bolu Programa vizita espesiál ba EhD sira atu hatene sira-nia situasaun detallu iha sira-nia jornada moris”, Alfredo dos Santos relata dadus ne’e ba TATOLI, iha Bairru Kosta, ohin.
Programa KDESTO Kovalima liuhusi Programa vizita espesiál ba EhD no apoia imediata no oferese apoiu nesesidade bázika labele fó benefísiu sustentavel ba futuru maibé ho intensaun atu hakbiit sira-nia nesesidade.
Apoiu imediata ne’e la’o hamutuk ho parseiru sira liga situasaun EhD nune’e partilla informasaun ba Palásiu prezidensiál no ba Centru Nasionál Reabilitasaun (CNR) atu responde kondisaun EhD hanesan, difisiénsia fiziku presiza saida? no EhD ain oinsá mak fó apoiu kadeira roda hodi fasilita sira halo movimentu no seluktan.
EhD na’in-550 ne’ebé mak hetan ona apoiu nesesidade bázika ne’e husi Postu administrativu Zumalai iha Suku Tashilin, Lour no Zulo, iha postu Maukatar iha suku Belekasak no Ogues. Iha postu Suai Suku Beko no iha Postu Maukatar iha suku Maudemo no Lalaua.
Nesesidade bázika ne’ebé fó apoiu mak hanesan foos saku ida ho marka Manu vitória Kilograma 25, koto kilograma rua, supermie, mina te’in, sardine, susu-been, foremungu no seluktan.
Programa no planu estratéjiku KDESTO 2023-2027 mak asegura partisipasaun ema ho defisiénsia iha públiku (muda pensamentu públiku kona-ba direitu EhD), asesu EhD nia partisipasaun iha edukasaun formál ho la’ós formál, deteksaun no prevensau sedu ba EhD labarik no joven, asegura EhD nia partisipasaun iha setór ekonomia hanesan kooperativa, agrikultura, negósiu, produsaun, peska no ortikultura.
Aleinde ne’e Garante EhD nia partisipasaun iguál iha setór justisa, infraestrutura, komunikasaun teknolojia ho asisténsia sosiál no seluktan ho Garante atividade desportu hodi mellora saúde EhD.
Jornalista:Celestina Teles
Editór: Rafael Ximenes de A. Belo
