DILI, 26 Abríl 2025 (TATOLI)—Papa Francisco la’ós hanesan líder relijiaun Katólik de’it, maibé hanesan mós figura mundiál, ema ne’ebé simples no hatudu espíritu serbí duni, tanba maski Timor-Leste dook maibé bele hiit aan mai vizita Timor-Leste.
“Maski Papa Francisco laiha ona, maibé ninia espíritu kontinua hamutuk ho povu Timor-Leste, tanba iha nia moris nia mós halo vizita apostólika ida mai Timor-Leste,” Sarani Teresa Alves Pereira, dehan bainhira tuir misa fúnebre Sua Santidade Papa Francisco iha Tasi-Tolu, sábadu ne’e.
Ho falesimentu Papa Francisco, nia dehan, hamosu laran dodok no triste tanba lakon figura ne’ebé sai modelu ba fraternidade umana.
Notísia relevante: Sarani sira hahú nadodon bá Tasi Tolu tuir misa requiem Papa Francisco
Iha fatin hanesan, Raul Varella hateten misa fúnebre ne’e importante ba sarani sira iha Timor-Leste tanba hanesan jestu omenajen ba Sua Santidade Papa Francisco.
Tuir nia katak Timor-Leste sente triste tanba lakon figura hanesan Papa ne’ebé hanorin ona Timor-Leste oinsá moris iha fraternidade no hanesan umana.
Jornalista: Natalino Costa
Editór: Xisto Freitas da Piedade
