DILI, 09 Maiu 2025 (TATOLI)-Embaixada Japaun hamutuk ho organizasaun Naun-Governamentál (ONG) of Services for the Health in Asian & African Regions (SHARE), iha sesta ne’e finaliza ona projetu konstrusaun moru inklui instalasaun bee-moos ba Ensinu Báziku Filiál (EBF) Manuleu no EBF Sabuli iha Postu Administrativu Metinaru, Munisípiu Dili.
“Ohin entrega moru eskola no instala bee-moos ba eskola rua ne’e, hodi ajuda proteje instalasaun fornesimentu bee ne’e husi animál hakiak no fatór esternu sira seluk, hodi garante sira-nia limpeza. Ida-ne’e sei motiva labarik sira atu prátika fase liman”, Embaixadór Japaun iha Timor-Leste, Tetsuya Kimura, dehan iha EPF Manleuana, Dili.
Nia hatutan: “Ami hein katak labarik sira iha eskola ida-ne’e sei dezenvolve ábitu ida kona-ba fase liman iha eskola”.
Embaixadór, Tetsuya Kimura, hateten liu ona tinan 25 Governu Japaun fó apoiu ba dezenvolvimentu Timor – Leste, Japaun mós implementa ona projetu over health–related iha Timor–Leste ne’ebé foka liu ba saúde inan no labarik, ne’ebé inisia iha tinan 2002.
Diretór Nasionál Infraestrutura no Edukativu iha Ministériu Edukasaun, Helio Lopes, reprezenta Ministru Edukasaun agradese ba Governu Japaun no SHARE ne’ebé halo ona konstrusaun moru eskola inklui fasilidade bee-moos ba EBF Manuleu no Sabuli.
Biban ne’e Ministériu Edukasaun husu ba Governu Japaun atu konstrui tan moru no fasilidade bee-moos iha eskola seluk iha Timor–Leste.
“Ha’u husu ba eskola rua ne’e atu kontinua hala’o manutensaun liuhosi uza orsamentu operasionál eskola nian husi Ministériu Edukasaun, nune’e bele uza ba tempu naruk”, nia konklui.
Reprezentante SHARE, Shutaro Sunai, husu ba eskola rua EBF Manuleu no EBF Sabuli atu tau atensaun no atu halo manutensaun rutina ba moru eskola no fasilidade bee-moos ho objetivu bele uza iha tempu naruk nia laran.
Moru protesaun ne’e hahú tinan 2022 no finaliza iha fulan-Jullu tinan ne’e no ohin bele entrega ona.
Notísia relevante: Governu Japaun no ONG SHARE entrega ró ida ba Ministériu Saúde
Jornalista : Osória Marques
Editora : Rita Almeida
