DILI, 13 Maiu 2025 (TATOLI)—Diretór Nasionál Marketing Ministériu Komérsiu no Indústria, Miguel de Carvalho Soares, hateten Ministériu Komérsiu no Indústria (MKI) sei realiza feira nasionál hodi selebra Restaurasaun Independénsia RDTL ba dala XXIII, 20 Maiu 2025, iha Portu Dili.
“Ami iha grupu hamutuk 150 atu aprezenta sira-nia produtu iha feira iha Portu Dili. Grupu sira-ne’e rejistu ho grupu liu 130 no ami sei hein rejistu foun, tanba negosiante sira-ne’e pertense ba grupu empreza kulinária, artezanatu, industriál no mós bebida,” Miguel de Carvalho Soares, dehan ba TATOLI, iha nia kna’ar fatin, Bebora, tersa ne’e.
Tuir nia, parte MKI organiza hela fatin feira ne’e ho di’ak ba grupu artezanatu, kulinária no bebida nune’e labele sai dezorganizadu.
Miguel haktuir katak feira ne’e sei hala’o durante loron neen nia laran ho prezensa husi grupu kriativu hotu no negosiante sira husi munisípiu sira.
“Ami sei realiza feira ne’e iha 15 Maiu 2025 lorokraik iha Portu Dili. Kada munisípiu iha nia produtu potensiál, tanba ne’e sira sei aprezenta iha feira ne’e,” nia hateten.
Nia dehan katak MKI prevee ona $73.220 ba feira ne’e ho tema: “Espozisaun Dezenvolvimentu,” ne’ebé ho objetivu atu promove produtu sira-ne’ebé dezenvolve hosi grupu kriativu sira hosi kada munisípiu.
Jornalista: Felicidade Ximenes
Editór: Xisto Freitas da Piedade
