DILI, 16 Maiu 2025 (TATOLI)—Diretora Ezekutivu Organizasaun Naun Governamentál Forum Komunikasaun ba Feto Timor-Leste (FOKUPERS), Domingas Afonso Amaral, hateten violénsia kontinua buras iha família, sosiedade no komunidade. Violénsia sai nafatin korente ne’ebé la kotu, violénsia pasadu sei lori nafatin impaktu ba feto nia moris to’o ohin loron, liuliu kazu infantisídiu.
“Tanba ne’e mak ami iha inisiativa hodi halo diskusaun amigável iha ámbitu selebrasaun Loron Restaurasaun Independénsia Timor-Leste ba dala XXIII. Ita hanoin katak númeru violénsia kontinua aas, liuliu kazu infantisidu, entaun FOKUPERS hanoin ida-ne’e intersante atu bolu organizasaun hotu-hotu, indivíduu, ativista sira-ne’ebé luta ba direitu umanu, organizasaun parseiru sira inklui jornalista sira, atu ita bele mai hamutuk haree asuntu ida-ne’e, katak tanbasá kazu infantisídiu kontinua akontese no feto nafatin sai vítima,” Diretora Ezekutiva FOKUPERS ba jornalista sira iha Faról, Dili, sesta ne’e.
Nia hatutan, diskusaun ida-ne’e fó espasu ba organizasaun no parseiru sira-ne’ebé ohin partisipa iha -ne’e atubele kontinua halo analiza no krítika liután, atu haree ba situasaun ida agora ne’e, seráke enkuadramentu legál ne’ebé iha ona ne’e, natoon ona atu responde ba situasaun ida-ne’e ka lae no tanbasá situasaun ida-ne’e kontinua akontese.
Domingas haktuir katak diskusaun ohin ne’e hamosu ona ezersísiu balun la’ós ba FOKUPERS de’it, maibé ba ema hotu-hotu hola-parte iha diskusaun ne’e, nune’e kontinua halo diskusaun ida-ne’ebé mak di’akliu, atu ema hotu-hotu bele haree asuntu feto ninian, tanba papél atu haree moris di’ak ba feto no labarik sira hotu-hotu, ne’e la’ós organizasaun ida-rua no FOKUPERS mesak, maibé papél ema hotu-hotu, indivíduu, hahú husi nia aan rasik, nia família, sosiedade no nasaun.
Husi diskusaun ne’e mós, Forum Komunikasaun ba Feto Timor-Leste sei halo relatóriu, hodi submete ba iha parte relevante sira nune’e bele haree kona-ba asuntu violénsia bazeia ba jéneru ne’e, basá kazu violénsia bazeia ba jéneru ne’e kontinua buras ba beibeik.
“Iha trimestrál primeiru ita konsege rejistu kazu hamutuk 88 ba violénsia bazeia ba jéneru, sira-ne’ebé mak asesu ba iha Uma Mahon. Entaun, sira-ne’ebé mak agora iha, tuir dadus husi Janeiru to’o Marsu, tinan ne’e, ita iha labarik sira-ne’ebé rejistadu hamutuk 28 ne’ebé hela hamutuk iha Uma Mahon,” nia haktuir.
Oradór sira iha Diskusaun Amigável ida-ne’e mak Board Forum Komunikasaun ba Feto Timor-Leste, Sekretária Estadu Igualdade (SEI), Asosiasaun Chega ba ita (ACbiit), Organizasaun Pupulár Muller Timor (OPMT), Programa Monitorizasaun ba Sistema Judisiál (JSMP-sigla inglés) no mós Asosiasaun Jornalista Timor Lorosa’e (AJTL).
Jornalista: Osória Marques
Editór: Xisto Freitas da Piedade
